Peqqissutsimut Inunnullu Innarluutilinnut Naalakkersuisoqarfik allaffimmi pisortassarsiorpoq
Sulisoqarnermut tunngasuni aqutsinermik misilittagalittut paasinnillaqqillutillu aaqqissuussilluarnikkut naammassisaqarluartarpit? Taamaappat Peqqissutsimut Inunnullu Innarluutilinnut Naalakkersuisoqarfimmi atorfinitsissinnaavatsigit.
Naalakkersuisumut naalakkersuisoqarfimmullu sullissinermi pitsaasumik ataqatigiissaarinissamik, aqutsinissamik kiisalu aqutsisoqatigiinnut ikiuunnissamik qulakkeerinnittarnissaq pingaarnertut suliassarissavat. Aningaasaqarnermik aqutsinerup, sulisoqarnermi aaqqissuussaanermilu ineriartortitsinerup, nutsikkat kiisalu suliassanik suliarinninnerit pitsaasuunissaannik qulakkeerinnittassaatittaaq.
Peqqissutsimut Inunnullu Innarluutilinnut Naalakkersuisoqarfimmi allaffimmi pisortatut, suliani aalajangiiffigisassani peqqissutsimut inunnullu innarluutilinnut tunngasuni qanimut suleqataallutillu sunniuteqaqataalluinnarsinnaasassaatit.
Aqutsisunut allattoqarfik
Allattoqarfimmi suliassat tamatigoorlutillu ilaatigut makkununnga tunngasortaqarput:
- Naalakkersuisumut naalakkersuisoqarfimmilu aqutsisoqatigiinnut sullissilluarneq.
- Naalakkersuisoqarfimmi aningaasaqarnermut tunngasuni aqutsineq malittareqqiinerlu.
- Namminersorlutik Oqartussaniit naalakkersuisoqarfinnut periusissiaalersussanik suliarinninneq timitaliinerlu, allattoqarfimmi attaveqaqatigiinneq kiisalu mailimut pingaarnermut saaffiginnissutinut apuussanullu allanut tunngasuni ataqatigiissaarineq.
- Naalakkersuisoqarfimmi aaqqissuussaanermut/pisortaqatigiit inerisaanermik suliaannut tunngasuni ataqatigiissaarineq, SSSA-mut tassa sumiiffimmi sillimaniarnermut suleqatigiinnermullu ataatsimiititaliamut sullissineq kiisalu sulisoqarnermut, tamatumani ilaatigut sulilerlaanik ilisarititsinermut sulisooreersunillu attassiniarnermut tunngasunik suliaqarneq.
- Nutserinermut oqaluttaanermullu tunngasuni isumaginninneq ataqatigiissaarinerlu.
Akisussaaffigisassatit
- Aqutsisunut allattoqarfimmi sulisoqarnermut tunngasuni ulluinnarni aqutsineq
- Allattoqarfimmi aningaasaqarneq, pilersaarusiorneq, nutsigassalerineq taakkualu nutserneqarnerisa pitsaasuunissaannik qulakkeerinninneq, suliassanik pingaarnersiuilluni tulleriiaarineq namminerlu allaffimmi aqutsineq
- Suliaqarfinnut tunngasuni immikkoortortaqarfiit Naalakkersuisut isummernissaannut tunngavissiaannik nassiussineq
- Naalakkersuisut suliaannik Inatsisartunut ingerlateqqitassanik isumaginninneq nassiussinerlu
- Naalakkersuisut Inatsisartullu ataatsimiinnissaannik ataqatigiissaarineq
- Suliaqarfinnut tunngasuni immikkoortortaqarfinnut kiffartuussineq; soorlu angalasussanut bilitsisineq, Acubizimi atuisunngortitsineq, siullertut akuersineq
- Sulianik suliaqarfinnut tunngasuni immikkoortortaqarfinnukartunik taakkunaneersunillu inaarsaariaatsinik ataavartumik pisariillisaaneq
- Taavalu pingaarutilinnik nammineq suliaqarneq, soorlu saqqummiussissutit, allakkiat suliallu Naalakkersuisumut ingerlateqqitassat pitsaassusaannik qulakkeerinninneq naalakkersuisoqarfimmilu pisortamit suliassiissutigeriataakkanik suliarinninneq, sulisoqarnermut tunngasuni suliaqarneq il.il.
Naatsorsuutigaarput:
Pisortani atorfimmi assingusumi sulinermik ukiuni arlalinni misilittagaqarlutillu sullivimmi politikkikkut aqunneqartumi pisariusunik suliassaqarfiusumi naammassisaqarluarsinnaasutit. Peqqinnissaqarfimmit misilittagaqaruit imaannaanngitsunilluunniit suliassaqarfiusumi sulinermik sungiussilertorsinnaaguit iluaqutaassaaq.
Qanilaarneq ataqqeqatigiinnerlu tunngavigalugit aqutseriaaseqarnissaq pingaartitaraarput, suliatigullu misilittagaqarnikkut, suleqatigiinnikkut, akisussaassuseqarnikkut tamakkiisumillu isiginninnikkut naammassisaqarfiulluartartumik aqutseriaaseqaruit iluarissavarput. Ulluinnarni ulapaarfiusinnaasaqisumi taavalu nutaanik imaannaanngitsunillu suliassiissuteqarfioriataarsinnaasartumi sulineq nuannarigittaaq naatsorsuutigaarput.
Taakku saniatigut naatsorsuutigaarput:
- Sulianut attuumassutilimmik bacheloritut kandidatitulluunniit ilinniarsimasuunissat
- Kalaallisut qallunaatullu oqaaseqartuullutillu allattariarsorsinnaanissat
- Namminersorlutik Oqartussat attaveqaataannik, tamatumani IRIS-imik, Acubisimik, aamma Ledelsesinfomik atuinermik misilittagaqarluartuunissat
- Piffissaliussanik eqquutititsisinnaanissat
- Anguniakkat qitiulluinnartut tunngavigalugit aqutsisinnaanissat naalakkersuisoqarfimmilu suleriaatsinik ataavartumik ineriartortitsisinnaanissat pisariillisaasinnaanissallu
- Attaveqallaqqissuunissat naalakkersuisoqarfimmullu tamarmut erseqqissumik paasisitsisinnaanissat
- Suliassiinermi oqimaaqatigiissaarillaqqillutillu tamakkiisumik isiginnissinnaanissat, taavalu naammassisat pitsaasuunissaannik qulakkeerinninneq
- Nammineq suleqatinut, qullersanut, peqqinnissaqarfimmi soqutigisaqaqatinut kiisalu suleqatinut avataaneersunut atassuteqallaqqissuunissat
Akissarsiat atorfininnermilu atugassarititaasut
Atorfik akissaateqarfimmi 36-mut naapertuuttumi maanna inissisimavoq. Akissarsiat aalajangersimasumik agguarneqarsimapput ukiunut aalajangersimasunut isumaqatigiissuteqarnermut tapit ilanngullugit LR 36 aallaavigalugu 1. april 2026-mit qaammammut Kr. 57.531 ukiumullu Kr. 690.372.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit pissapput.
Ineqarneq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut inigisani tigummiinnarsinnaavaa. Sulisutut inigisaq atorfeqarnermut atasuuvoq, atorfeqarunnaarnermilu qimanneqartussaassalluni.
Om Naalakkersuisut
Søger du udfordringer og har lyst til at præge hverdagen gennem dit arbejdsliv og være med til at forme fremtiden, så er et job hos Grønlands Selvstyre noget for dig. Vi forventer stor ansvarlighed og vægter faglige kvalifikationer, en sund analytisk tilgang til tingene samt omstillingsparathed højt hos medarbejderne. Herudover er din evne til at strukturere hverdagen og bevare overblikket vigtig. Grønlands Selvstyre består af en Centraladministration, med mere end 650 ansatte fordelt på flere departementer, samt en lang række decentrale enheder. Tilsammen er vi mere end 2500 mennesker tilknyttet Grønlands Selvstyre. Centraladministrationens opgave er, at sikre Naalakkersuisut (regeringen) et solidt politisk beslutningsgrundlag, samt at føre de politiske beslutninger ud i livet. Du kan læse mere om Grønlands Selvstyre på http://www.naalakkersuisut.gl/job