Suliassaqarfiit Kalaallit Nunaata siunissaanut pingaaruteqarnerpaat ilaannut sammivileeqataarusuppit?

Ilinniartitaaneq, Kultureqarneq, Timersorneq Ilageeqarnerlu suliassaqarfiupput assigiinngitsut, kalaallilli inuiaqatigiivisa ineriartornerannut pingaarutilimmik tamarmik inissisimapput. Meeqqat inuusuttullu ilinniarnissamut periarfissaanniit ilisimatusarnermut piginnaasanillu ineriartortitsinermut kiisalu kultureqarnermiit timersornermiillu ilageeqarnermut aammalu inunnik ataqatigiilersitsisartunut ataatsimoorfinnut.

Pisortamik misilittagalimmik, ingerlatsivimmi suliatigut assigiinngitsunik piginnaasaqarfiusumi ataatsimoortitsisinnaasumik aqutsisullu sulisullu allat aqqutigalugit angusanik pilersitsisinnaasumik ujartuivugut. Qitiusumik suliassaq tassaassaaq ataatsimut aqutsinerup pitsanngorsarnissaa, pingaarnersiuinerit erseqqissut qulakkeernissaat suliamullu piginnaasaqarluarluni suleqatigiiffiusumik ineriartortitsinissaq. Suliassaqarfimmut akisussaaffigisamut tamarmik takunnissinnaassaatit aammalu ulluinnarni ingerlatsinerup suliassallu politikkikkut aalajangerneqartut siuariartornissaat qulakkeersinnaassallugu.

Naalakkersuisoqarfimmi pisortatut politikikkut aalajangiunneqartut qanimut inissisimaffigalugit taamatuttaarlu aalajangerneqartut iliuutsinut piviusunngortinnissaat akisussaaffigalugit qitiusumik inissisimassaatit. Naalakkersuisoq siunnersortassavat, naalakkersuisoqarfiup sulineranut sammiviliissaatit kiisalu naalakkersuisoqarfiup akisussaaffiisa siammasissut, politikkikkut inuiaqatigiinnilu annertuumik malinnaaffigineqartut, akornanni ataqatigiinneq pilersissallugu.

Taamaattumik naalakkersuisoqarfimmi pisortamik, siammasissumik isigisinnaassusilimmik piviusunngortitsinissamillu qulakkeerinnissinnaasumik pissarsiorpugut. Aqutsisoq kalaallinut inuiaqatigiinnut politikikkullu pissutsinut piviusunut paasinnittoq, sammivimmullu ataatsimoorussamut suliamut ilisimasanik assigiinngitsunik katersuutsitsisinnaasoq.

Naalakkersuisuni allaffissornikkut aqutsisut qullersat ilagissavaatsit taamaalillutillu Kalaallit Nunaat tamakkerlugu kommuninik, ilinniarfeqarfinnik, kattuffinnik ingerlataqartunillu allanik suleqateqarnermi pingaarutilimmi inissisimassallutit.

Naalakkersuisoqarfik pillugu

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi suliassat amerlaqaat Naalakkersuisunik sullissinerniit oqartussaaffinnik pingaarnertut aqutsinerit.

Naalakkersuisoqarfik suliassaqarfinnik assigiinngitsutigut inunnut ataasiakkaanut aammalu kalaallini inuiaqatigiinni ineriartornermut annertuumik pingaaruteqartunik suliaqarpoq. Ilinniartitaanermut suliassaqarfik siammasippoq, matumaniillutik ilisimatusarneq, kulturi, timersorneq ilageeqarnerlu.

Qitiutinneqartut tassaapput Kalaallit Nunaat tamakkerlugu ilinniartitaanermut piginnaasanillu ineriartortitsinermut tunngavinnik pitsaasunik pilersitsinissaq kiisalu meeqqat inuusuttullu ilinniagaqarnissamut ineriartoqqinnissamullu pitsaasunik periarfissaqarnissaasa tapersersornissaat. Taamatuttaaq kulturi, timersorneq ilageeqarnerlu ataatsimoornermut, kinaassutsimut kalaallillu inuiaqatigiinni ataqatigiinnermut pingaaruteqarluinnarput.

Naalakkersuisoqarfik suliassaqarfimi iluani kisitsisitigut uppernarsarneqarsimasunik pingaarutilinnillu paasissutissaliornissamut tunngavimmik qulakkeerinnissaaq, taamaalillutik paasissutissat Naatsorsueqqissaartarfimmit atorneqarsinnaaniassammata. 

Naalakkersuisoqarfiup ilinniartitaanermut suliassaqarfik pillugu EU-mik suleqatigiinnissamik isumaqatigiissutip ilinniartitaanermut suliassatigut tunngasortaa isumagisaraa, tassunga ilanngullugu Inatsisartunut EU-mullu nalunaaruteqartarneq.

Akisussaaffiit

Naalakkersuisoqarfiup pisortaata Naalakkersuisup pitsaalluinnartumik siunnersornissaata sullinnissaatalu qulakkeernissaa kiisalu aqutsisoqatigiit allat peqatigalugit naalakkersuisoqarfiup ulluinnarni aqunnissaa suliassarai.

Naalakkersuisoqarfimmi pisortaq Qitiusumik Allaffeqarfimmi aqutsisoqatigiinnut aamma ilaavoq.

Naalakkersuisoqarfimmi pisortatut ilaatigut makku akisussaaffigissavatit:

• politikkikkut aqutsisunut aalajangiinissamut tunngavinnik qulakkeerinissaq politikikkullu aalajangiunneqartut iliuutsinut angusanullu piviusunngortinnissaat
• naalakkersuisoqarfiup nammineq suliassaqarfimi iluani aammalu naalakkersuisoqarfinnik allanik, aqutsisoqarfinnik, suliffeqarfinnik suleqatigisanillu allanik suleqatigiinnermi suliassanik naammassinninnerup ataqatigiissarnissaa
• suliffeqarfiup iluani avataanilu suleqatigiinnermut pitsaasumut angusaqarfiusumullu eqeersimaartumik peqataanissaq
• allaffissornikkut najoqqutassanik, periutsinik pitsaassutsimullu piumasaqaatinik atuutilersitsinissap qulakkeernissaa
• aqutsisut qullersat aamma naalakkersuisoqarfiup ineriartortinnera
• suliffeqarfiup sulisullu ineriartortinnerat kiisalu attaveqaqatigiinnermut aamma kikkut attaveqarfissatut aqutsisutut qaninnerusutut inissisimanerannut tunngasut erseqqissuunissaat
• suliassanik pilersaarusiorneq, suliamut tunngasunik ineriartortitsineq aamma naalakkersuisoqarfiup isumalluutaanik atuilluarnissaq

Illit makku piginnaaneqarfigissagitit naatsorsuutigaarput

• kandidatitut qaffasissusilimmik attuumassutilimmik tamatumunngaluunniit assingusumik attuumassuteqartumik qaffasinnerusumik ilinniagaqartutit.
• suliffeqarfimmi politikikkut aqunneqartumi pisortatut aqutsinermik misilittagaqarluartutit. Aqutsisut allat aqqutigalugit aammalu suliamut ilisimasaqarfiit assigiinngitsut akornanni aningaasaqarnermut, sulisunut angusanullu ataatsimut akisussaaffigalugit aqutsinermik misilittagaqartutit.
• suliffeqarfimmik ineriartortitsinermi, allannguinernik naammassisani politikikkullu aalajangikkanik piviusunngortitsinermi angusanik uppernarsaasinnaasutit. Kalaallit inuiaqatigiinnut sukumiisumik ilisimasaqarputit aammalu politikikkut allaffissornikkullu aqutsinerit ataqatigiinnerat paasisinnaavatit.

Misilittakkatit naalakkersuisoqarfiup suliassaqarfittut akisussaaffeqarfiata iluani avataaniluunniit pissarsiarisimasinnaavatit. Suliassaqarfinnut ilisimasaqarneq iluaqutaassaaq. Qinnuteqartunik nalilersuinermi aqutsisutut misilittakkat angusimasallu uppernarsarneqartut pingaarnerpaatinneqassapput.

Makkunannga piginnaasaqarnissat pingaartipparput:

• politikkimut paasisimasaqarneq. Suliffeqarfimmi politikikkut aqunneqartumi sulinermik misilittagaqarputit aammalu politikikkut allaffissornikkullu aqutsinerit akornanni ataqatigiissutaasut paasisinnaallugit.
• aningaasaqarnerup pitsaasumik aqunneqarnissaanik aamma pisariinnerulersitsinissamut aningaasaliissutinillu pitsaanerusumik atuinissamut eqeersimaartumik periarfissarsiorsinnaasutit.
• ataqatigiissumik sulisinnaasutit naammassinninnissamillu qulakkeerisinnaasutit. Politikikkut aalajangikkat anguniakkanut, pingaarnersiukkanut akisussaaffinnullu erseqqissunut piviusunngortissinnaagitit. Siuariartorneq angusallu aaqqissuulluakkamik malinnaavigisinnaagitit suliallu unittoorfiini nammineq suliniuteqarlutit aaqqiiniarsinnaasutit. Ataatsimut isiginninnerit attassinnaagit aammalu ineriartortitsinermik suliassat ulluinnarnilu ingerlatsinerup ataqatigiinnissaat qulakkeersinnaagitit.
• ersarissumik aqutsinnaasutit tatiginassuseqartutillu. Sammivimmik erseqqissumik aalajangersaasinnaasutit suliassanillu pingaarnersiuisinnaasutit. Nammineq pissusilersuutitit aqutseriaatsillu suliffeqarfimmut qanoq sunniuteqarsinnaanersoq ilisimaarigit.
• ataqatigiinnermik suleqatigiinnermillu pilersitsisinnaasutit. Erseqqissumik tatiginartumillu attaveqarsinnaasutit naalakkersuisoqarfiullu suliamut ilisimasaqarfii akornanni suleqatigiinneq qulakkeersinnaagit. Suliffeqarfiup iluani avataanilu suleqatigisanik pingaarutilinnik peqataasitsisinnaasutit attaveqaatinillu pitsaasunik pilersitsisinnaasutit.
• kalaallisut, danskisut tuluttullu oqaatsitigut piginnaasaqarluartutit.

Aqutsisutut suliassat

Aqutsisoqatigiinnik ingerlalluartunik, naalakkersuisup ataatsimut isigalugu suliamik naammassinninneranut ataatsimut akisussaaffimmik tigusisinnaasunik ineriartortitsissaatit. Pitsaassuseq, siuariartorneq suleqatigiinnerlu pillugit naatsorsuutinik erseqqissunik pilersitsissaatit isumaqatigiissutinillu angusanillu aaqqissuussaasumik malitseqartitsisassallutit.

Sullivimmut suliat pillugit ilisimasaqarluarfiusumut, ataqqeqatigiiffiusumut naligiitsitsisumullu akisussaaffeqalissaatit. Isumaqatigiinngissutaasut siusissukkut kinguneqarluartussamillu iliuuseqarfigissavatit. Suliamut ilisimasatigut nalilersuinerit assigiinngitsut ammasumik saqqummiunneqarsinnaanissaat aalajangeriikkallu malinneqarnissaat qulakkiissavatit.

Aqutsisutut qullersatut akisussaaffitit namminerlu pissusilersuutivit sunniutai ilisimaarivatit. Utertitsiffigineqarnissamik qinnuiginnittarputit namminerlu aalajangikkatit akisussaaffittut tigusarlugit. Nunarput nunanilu tamalaani pissutsinut siammasissumik isiginnittaaseqarputit suliamullu ilisimasat, oqaatsit kulturikkullu tunuliaqutit ataqqillugit suleqateqarsinnaallutit.

Attaveqarfigisassanut oqartussaasunut pissutsit

Naalakkersuisoqarfimmi pisortaq naalakkersuisoqarfiup suliassaqarfiani Naalakkersuisut politikikkut anguniagaasa piviusunngortinniarnerannut naalakkersuisoqarfiullu suliatigut aqutsivigineranut ingerlanneqarneranullu tunngatillugu apeqqutinut tunngatillugu Ilinniartitaanermut, Kultureqarnermut, Timersornermut Ilageeqarnermullu Naalakkersuisumut attaveqassaaq.

Naalakkersuisoqarfinnut allanut tunngatillugu naalakkersuisoqarfiup suliassaanik susassaqarfiit pillugit ataqatigiissaarinissamut tunngassuteqartut kiisalu ataatsimut aqutsinermi anguniakkanut malittarisassanullu tunngassuteqartut pillugit naalakkersuisoqarfimmi pisortaq Naalakkersuisut Siulittaasuata Naalakkersuisoqarfiani pisortamut innersuussisassaaq.

Atorfeqarnermi atugassarititaasut

Atorfik ukiuni sisamani aalajangersimasumik atuuttussamik piaarnerpaamik isumaqatigiissuteqarnikkulluunniit inuttalerneqassaaq.

Atorfik akissaateqarfimmi LR 39-p assingani maanna inissisimavoq.  Akissarsiat aalajangersimasumik agguartorneqarsimapput ukiunut aalajangersimasunut isumaqatigiissuteqarnermut tapit ilanngullugit LR 39 aallaavigalugu 1. april 2026-miit qaammammut Kr. 99.438 Kr.-upput ukiumullu Kr. 1.193.256.

Tunngaviusumik ukiuni aalajangersimasuni atorfinitsitsisoqartarpoq. Qinnuteqartoq tjenestemanditut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Tamatuma saniatigut tjenestemandinut akissarsiaqarani sulinngiffeqarsinnaanerit atuupput, kiisalu AC-tut atorfeqarnermi isumaqatigiissutit arlallit atuullutik, tamatumani ilanngullugu Namminersorlutik Oqartussat ataani atorfilimmik katissimallugu aappaqarneq inooqateqarnerlu.

Sulinerup sivisussusaa aallaavittut sapaatip akunneranut akunnerit 40-pput. Atorfimmut tunngatillugu piffissap suliffiusussap qanoq sivisutiginissaa killilersugaanngilaq aamma qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat pillugit aalajangersagaq atorneqarsinnaanngilaq.

Ineqarneq

Atorfimmut atasumik inissaqartitsisoqanngilaq. Qinnuteqartoq Namminersorlutik Oqartussani sulisutut ineqareersimaguni, tamanna attatiinnarneqassaaq. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Paasissutissat sukumiinerusut

Aqutsinermi suliaq ataaseq arlallilluunniit suliffeqarfimmik aqutsinermi peqataaffigisimasatit, suleqataaffigisimasat angusimasatilluunniit qinnuteqaammi naatsumik nassuiaqquneqarput. Nammineq akisussaaffitit, iliuuserisartakkatit pingaarnerpaat angusatillu nassuiakkit.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup aaqqissuussaanera nassuiarneralu uani takuneqarsinnaapput:

https://naalakkersuisut.gl/Departementer/Uddannelse_Kultur_Idraet_Kirke?sc_lang=kl-GL

https://naalakkersuisut.gl/Departementer/Uddannelse_Kultur_Idraet_Kirke?sc_lang=kl-GL 

Qinnuteqartut misilitsittussaassapput, isumannaallisaanikkullu akuerisaasinnaassallutik.

Namminersorlutik Oqartussat aqutsinermut tunngavii uani atuarneqarsinnaapput:

https://naalakkersuisut.gl/Departementer/Formandens_Departement/Ledelsesgrundlag

Qinnuteqarfissamut killigititaq

Ataasinngorneq 30. novembari 2026 kalaallit nalunaaqutaat malillugu nal. 12.00.

Soqutiginnippit?

 

Atorfik pillugu apeqqutissaqaruit Partner Dorthe Flies, Flies HR-imeersoq oqarasuaammut uunga: +299583117 imaluunniit mailimut uunga dorthe@flieshr.dk attavigisinnaavat.

Flies HR-ip sulisussarsiorneq isumagisassaraa, taamaammat saaffiginninnerit tamarmik tassunga ingerlateqquneqarput. 

Atorfik pillugu paasisaqarnerorusukkuit Naalakkersuisut Siulittaasuata Naalakkersuisoqarfiani Hans-Peder Barlach Christensen hape@nanoq.gl-mut saaffigisinnaavaat

Tusarfiginissat qilanaaraarput. 

Naalakkersuisut

Naalakkersuisut pillugit paasissutissat allat uani nassaarisinnaavatit www.nanoq.gl