Suleriaatsinik paasinnillaqqippit? Ataatsimut sukkasuumik takunnissinnaavit, aammali sukujualuttortaanik takunnissinnaalluarlutit? ”Akissarsiat” pillugit ilisimasaqarpit? Illit tassaavit ulluni ulapaarfinni kajumilersitsisinnaasoq? Taava immaqa illiuvutit Aningaasaqarnermut Sulisoqarnermullu Aqutsisoqarfimmi Akissarsialerivimmi allaffimmi pisortaasussaq.  

Allaffimmi qaammammusiallit, akunnermusiallit kiisalu Namminersorlutik Oqartussat Peqqinnissaqarfiullu ilaani soraarnermusiallit 11.000-it missaat akissarsiaat suliarineqartarput. Qaninnertut suleqatissatit tassaassapput Sulisoqarnermut immikkoortortaq, Qitiusumik Naatsorsuuserivik, Aqutsisoqatigiinnut allattoqarfik kiisalu illit qaninnertut aqutsisussat, Sulisoqarnermut isumaqatiginninniarnermilu pisortaq.  Illit allaffiillu suleqatillu 12-t missaanniittut Namminersorlutik Oqartussani immikkoortunik tamanik qanimut suleqateqassaasi. 

Ukiuni kingullerni suleriaatsinik pitsanngorsaaqqinnermik ukkatarinnittoqarpoq, ilaatigut ingerlatsinermut allattuiffinnik, immersugassanik digitalinngortitsinikkut, e-boksimik atuinermik il.il. Taamaammat atorfik unammillernartoqarpoq, ukkatarinnissinnaanermik kiisalu nammineq suliassaqarfimmik aaqqissuussamillu pitsanngorsaqqiisinnaanernik piumasaqataatinik peqarluni. 

Illit suliassatit

Allaffimmi pisortatut allaffimmi ulluinnarni sulisunut sulianullu aqutsisutut akisussaasuussaatit. Suliassat suliarinissaannut siunnerfimmik ataatsimullu isiginnilluni suliaqartitsissaatit, isumalluutit pingaarnersiorneranni sulianillu pitsaalluinnartussaannik piffissarlu eqqorlugu tunniussinissamik isumannaarisassallutit. Aamma allaffimmi pisortatut atorfik aqutsisuutigaluni suliaqarluni atorfiuvoq, tassanilu naatsorsuutigineqarpoq allaffimmi suliassanik suliarinninniarnermi peqataasarnissat.   Akissarsialerinermi suliassanik ineriartitsinissamut sunneeqataalluarsinnaallutit kajumissuseqarluarlutillu. 

Atorfimmi uku ilaatigut akisussaaffigissavatit:

• Allaffimmi ulluinnarni suliassat aqunneri, pingaarnersiorneri ataqatigiissaarnerilu. 
• Sulisut ineriartornerat pitsaasumillu atugaqarnissaannik qulakkeerinninneq  
• Sulianik suliarinninnermi pitsaassusaasa qulakkeernissaat kiisalu allaffimmi suliassat pingaarnerit suliarinissaannut pitsaasumik aaqqiissuteqarnissaq. 
• Suliffimmi namminermi suleriaatsinik ingerlatsinernillu ineriartortitseqqinnerup qularnaarnissaa
• Suliffimmi namminermi avataanilu immikkoortortat akornanni pitsaasumik attaveqartarnerup naammagisimaarinninnerullu qulakkeernissaa

Suliamut tunngatillugu piginnaasassatit

• Suliamut tunngasumik ilinniarsimasoq aqutsinermillu misilittagalik
• Sulisunik aqutsinermik suliaqarnermik misilittagaqarneq. 
• Pisortat ingerlatsiviini naatsorsuusiornermut malittarisassanik aammalu akissarsialerinermik misilittagaqartutit 
• Akissarsialerissummik ”Akissarsiat”-nik ilisimasaqarluartutit ajornanngippallu misilittagaqartutit 

Illit inuttut piginnaasatit

• Suleqatigiinnillaqqissoq aaqqissuussaq Namminersorlutillu Oqartussani immikkoortut akimorlugit attaveqaqatigiinnik pilersitsisinnaasoq. 
• Suleqatit inuulluarnissaannut, suliatigut inerikkiartornissaannut, akisussaaffeqarnissaannut nammineersinnaanissaannullu pitsaasunik tunngavissiisinnaasoq
• Naammagittartuusutit aammalu suleqativit suliat tungaatigut angusaqarluarnissaannik kaammattorsinnaagitit, minnerunngitsumik ulapaarfiup nalaani 
• Naammassisaqarnissamik anguniagalik, iliuuseqallaqqissoq piffissamillu tatineqarluni sulisinnaasoq 
• Ammasuulluni ilakkuminartuuneq, attavigiuminartuuneq aamma aaqqissugaanikkut avatinniittunik kajumissaarisinnaassuseq
• Kalaallisut allassinnaallutillu oqalussinnaasutit 

Neqeroorutigaavut

ASA sulisorpassuaqarpoq sulianut ukkatariffiusoq, digitalinngortitsiviulluni, suleriaatsinik pitsanngorsaaviusoq kiisalu suleqatigiit assigiinngitsorpassuullutik.  Qitiusumik allaffeqarfiup pisortanik ineriartortitsinikkut neqeroorutigisartagai aqqutigalugit aqutsisuuninnik ineriartortitsinissamut pitsaasunik periarfissaqassaaq aamma tassunga ilutigitillugu akissarsialerinikkut naatsorsuuserinerup aamma sulisunik aqutsinerup iluani pikkorissutsit nukittorsarsinnaallugu. Akissarsialerinermi suliassanik ineriartitsinissamut sunneeqataalluarsinnaallutit kajumissuseqarluarlutillu.  Akissarsialerivimmi persuarsiortorsuunngilagut suleqatigiittullu ataatsimooqatigiilluarluta, aamma ulapaarfiit nalaanni.   

Uagut pilluta

Akissarsialerinermik allaffik Aningaasaqarnermut Sulisoqarnermullu Aqutsisoqarfimmut (ASA) ilaavoq, taannalu aqutsisoqarfik Aningaasaqarnermut Naalakkersuisoqarfiup ataaniippoq.   ASA 110-t missaannik sulisoqarpoq, taakkununnga ilanngullugit sulinermik misiliisut, taartit ikiortillu ilinniartut.  ASA pillugu itinerusumik uani atuarsinnaavutit: wwww.asa.gl 

Paasissutissat sukumiinerusut:

Atorfik pillugu annertunerusumik paasisaqarusukkuit, Sulisoqarnermut aamma Isumaqatiginninniarnermut pisortaq Frederik Schmidt attavigisinnaavat oqarasuaat +299 346681 
e-mail: fsch@nanoq.gl aqqutigalugit.

Qinnuteqartut misilitsinnissamik ingerlannissaa piareersimaffigisariaqassavaat.

Qinnuteqarfissamut killigititaq 

Qinnuteqarnissamut killigitinneqarpoq 12. novembari 2026. 

Atorfininnissaq

1. januari 2027 aallarnerfigalugu isumaqatigiissuteqarnikkulluunniit. 

Atorfeqarnermi atugassarititaasut

Atorfik akissaateqarfimmi LR 36-p assingani maanna inissisimavoq.  Akissarsiat aalajangersimasumik agguarneqarsimapput pensioninut nammineq akiliutissanik tapit ilanngullugit LR 36 aallaavigalugu 1. april 2026-miit  qaammammut kr. 57.531 koruuniupput ukiumullu 690.372 koruuniullutik.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput. Naalagaaffimmi tjenestemand-it AC-tut isumaqatigiissutit arlalissuit naapertorlugit atorfillit, ilaatigut DJØF-ip Finansministeriallu akornanni isumaqatigiissutit naapertorlugit, Kalaallit Nunaanni Namminersorlutik Oqartussat ataanni atorfeqarnerminnut atatillugu aningaasarsiat pigiinnarlugit sulinngiffeqarallarsinnaatitaanermut pisinnaatitaaffeqarlutik. Aammattaaq Nunamut namminermut ministeriaqarfiup kommuninut nunallu immikkoortortaanut inassutigisimavaa, Kalaallit Nunaanni Namminersorlutik Oqartussat ataanni atorfinitsitaanerminnut atatillugu akissarsiaqaratik sulinngikkallarnissamut qinnuteqaateqartunut akuersaartumik pissusilersornissaq. Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut katissimasaannut /aappaannut aamma atuupput.

Aallaavittut sapaatip akunneranut sulineq akunnernik 40-nik sivisussuseqarpoq, aamma ukiumut akunnerni 320-ini qaammatillu pingasuugaangata akunnerni 80-ini suliartoqquneqarsinnaaneq atorfininnermut attuumapput, ullullu sulinngiffiusussat annaaneqarsimasut ajunngitsorsiassaqarfiginissaat pillugu aalajangersakkat atuutinngillat.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.