Ilisimatusarfik Ilinniartitsinermik Ilisimatusarfimmut misilittagalimmik, tunniusimasumik suliatigullu nukittuumik instituttimi pisortassarsiorpoq. Pisortartaassaq instituttimi ilinniakkat ineriartortinnerini siuttuusinnaassaaq, ilisimatusarnerup iluani piginnaassuseqqortussutsimik nukittorsaasinnaassaaq kiisalu kalaallit inuiaqatigiit pisariaqartitaat tunngavigalugit avatangiisinik ilisimatusarfiusunik ilinniarfiusunillu pilerinartunik ineriartortitseqqiisinnaassalluni. 

Pisortamik siumut isiginneriaasilimmik, ataatsimoortitsisumik, ilisimatusarnermut tunngasunik misilittagaqarluartumik, aqutsinermik misilittagaqartumik aammattaaq ilinniartitaaneq Ilinniartitsinerlu pillugit ilisimasalimmik pissarsiorpugut. Instituttip pisortaatut ilinniartitsisunngorniarfimmik, ilinniaqqiffinnik ingerlaqqiffiusumillu ilinniakkamik kiisalu instituttimi ilisimatusarnermi ingerlassanik ineriartortitsinermi qitiusumik atuuffeqassaatit, tamatumunnga ilanngullugu ilisimatuutut misissuivimmik Iluliamik ineriartortitsineq.

Atorfik decembarip aallaqqaataani 2026 imaluunniit isumaqatigiissuteqarnikkut piaarnerpaamik inuttalerneqassaaq.

Ilinniartitsinermik Ilisimatusarfik pillugu 

Ilinniartitsinermut Ilisimatusarfik Ilisimatusarfiup ataaniippoq Kalaallit Nunaannilu ilinniartitsinerup, atuartitseriaatsip perorsaanerullu iluanni ilinniartitaanermi, ilisimatusarnermi piginnaanngorsaanermilu qitiusumik atuuffeqarpoq.

Instituttip ilinniartitsisunngorniarfik aamma ilinniartitsisunut ilinniaqqiffiit ingerlaqqiffiusumillu ilinniakkat kiisalu instituttip suliassaqarfiini ilinniakkami ingerlassat allat isumagai.

Instituttimi ingerlassat ilaatigut tassaapput: 

• Ilinniartitsinermi bachelorinngorniarfik (ilinniartitsisunngorniarfik).
• Ilinniaqqiffiit ingerlaqqiffiusumillu ilinniakkat kiisalu ilinniartitsisunik piginnaanngorsaqqiineq.
• Atuartitseriaatsimi, kulturit naapinneranni allanngoriartornernilu masteritut ilinniagaq
• Ilinniaqqiffinni atuartitsissuteqarsinnaaneq (universitetspædagogikum).
• Ilikkariartornerup, ilinniartitsinerup, perorsaanerup ilinniartitaanerullu iluanni ilisimatusarneq aamma ineriartortitsinermi ingerlassat.

Nunatsinni pissutsit, oqaatsivut, kulturi inuiaqatigiinnilu pisariaqartinneqartut aallaavigalugit ilisimatusarnerup, ilinniartitaanerup suleriaatsillu ataqatigiinnerisa nukittorsarnissaa pillugu institutti sulivoq.

Suliassani pingaartoq tassaavoq ilinniakkat pitsaassusaannik naleqquttuunerannillu qulakkeerinnittarneq tamannalu ilutigalugu ilisimatusarnikkut, ilisimasanik paasissutissiortarnikkut ingerlataqartunillu attuumassuteqartunik suleqateqarnikkut nunatsinni ilinniartitaanermi aaqqissuussaanermik ineriartortitseqataaneq.

Instituttip meeqqat atuarfii, kommunit, ilinniartitaanermut oqartussat, ilisimatusarnermik ingerlatsiviit aamma nunatsinni nunanilu tamalaani suleqatigisat suleqatigai.

Ilinniartitsinermik Ilisimatusarfik 25-nik sulisoqarpoq tassaasut lektorit, ilinniarfimmi lektorit, studieadjunktit, immikkut ilinniakkani ilinniartitsisut kiisalu tikeraatut ilinniartitsisut, lektorit ikiortaasut professorillu. 

Institutti 140-nik bachelorinngornianik ilinniartuuteqarpoq, tamatumalu saniatigut ilinniartitsisunut suliamullu ilinniarsimasunut allanut ilinniaqqiffiit, ingerlaqqiffiusumik ilinniakkat piginnaanngorsaqqiinerillu isumagai.

Iluliaq - Kalaallit Nunaanni Ilinniartitsinermik Ilinniartitaanermillu Ilisimatusarfik

Ilisimatuutut misissuiffik Iluliaq Ilinniartitsinermik Ilisimatusarfiup ataaniippoq instituttillu ilisimatusarnermut avatangiisaani pingaarutilittut ilaalluni.

Kalaallit Nunaanni ilinniartitsinermik ilinniartitaanermillu ilisimatusarneq nukittorsarniarlugu aamma ilisimasat nunatsinni ilinniartitaanermi aaqqissugaanermut inuiannullu naleqquttut ineriartortinnissaat pillugit Iluliaq sulivoq.

Ilisimatusarnerup, ilinniartitaanerup suleriaatsillu ataqatigiitsinniarlugit aamma nunatsinni nunanilu tamalaani ilisimatusarnerup iluani suleqateqarnerit ineriartortinniarlugit ilisimatuutut misissuivik tapersiisarpoq.

Instituttip pisortaatut Iluliap periusissiukkamik ineriartortinneqarnissaanut ikorfartuissasutit kiisalu ilisimatusarnermi sammisat, ilisimatusartunngorniarnermut ilinniakkap piginnaanngorsaanerullu pitsaasunik sinaakkuteqarnissaannut tapersiisarnissat naatsorsuutigineqarpoq.

Instituttimi pisortatut suliassatit

Instituttip pisortaa rektorip ataaniippoq Ilinniartitsinermillu Ilisimatusarfimmik aqutsinermut periusissiukkamillu ineriartortitsinermut akisussaaffik tigummivaa.

Ilisimatusarfik pillugu Inatsisartut inatsisaat nr. 12, 12. juni 2019-imeersoq naapertorlugu instituttip pisortaa aamma immikkoortortaqarfimmi pisortaa instituttimik aqutsisuupput, taakkualu instituttip ulluinnarni aqunneqarnera najoqqutassat rektorimit akuerineqarsimasut naapertorlugit ulluinnarni aqutsineq isumagaat, tamatumunnga ilanngullugit suliassanik pilersaarusiornerit agguaassinerillu.

Instituttimi aqutsisut instituttimi ilisimatusarnerit, ilinniartitsinerit, ineriartortitsinerit, missingersuut sulisullu akisussaaffigaat.

Instituttimi aqutsisoq inatsimmi aalajangersakkat naapertorlugit instituttimi sulisunik atorfinitsitsinissamut soraarsitsinissamullu piginnaatinneqarpoq. 

Instituttip pisortaata sulisut ilisimatusarnissamut kiffaanngissuseqarfiat ataqqineratigut aamma instituttimi siunnersuisooqatigiit, sulisut ilisimatusarfimmilu pisortat allat qanimut suleqatiginerisigut instituttip ataqatigiittumik ineriartornissamillu toraagalimmik aqunneqarnissaa qulakkiissavaa.

Naatsorsuutigineqarpoq instituttip pisortaa

• Aqutsisutut ataatsimoortitsisutut, ersarissutut oqaloqatigiinnernik pingaartitsisutut, suliatigullu tunngaveqartumik isumaliutigilluakkamillu aalajangiisartutut atuuffeqarsinnaassasoq.
• Siumut isiginneriaaseqarlunilu aallarnisaallaqqittuussasoq aamma Ilisimatusarfiup periusissiaa malillugu instituttip ilisimatusarnermut ilinniartitaanermullu avatangiisai pilerinarsarlugit ineriartortitsisinnaassasoq.
• Instituttimik aqutsinermi siuttuusinnaallunilu immikkoortortaqarfiup pisortaanik sulisunillu suleqateqarneq pilersitsiffiulluarnissaa qulakkeersinnaassagaa.
• Suleqatinik kajumissisitsisinnaassasoq, tapersersuisinnaassasoq ineriartortitsisinnaassasorlu kiisalu ilisimatusarnermi ilinniartitaanermilu piginnaassuseqqortussutsimik ineriartortitseqataasinnaassasoq.
• Instituttip suliassaqarfii pillugit paasisimasaqassasoq ilinniakkallu, ilisimatusarnerit aamma inuiaqatigiit pisariaqartitaannik ataqatigiissilersitsisinnaassasoq.
• Kalaallit Nunaanni inuiaqatigiit ilinniartitaanerullu aaqqissuussaanera pillugit paasisimasaqassasoq, tamannalu ilutigalugu nunanut tamalaanut tunngasunik malinnaasuussasoq.
• Ilisimatusarfimmi pisortat allat, sulisoqarnermut immikkoortortaqarfimmik, Ilinniartunik Sullissivimmik allaffissornikkullu aqutsisoqatigiiffimmik suleqateqarsinnaassasoq.
• Suliffimmi ilinniarfimmilu avatangiisit pitsaasuunissaannut, peqataatitsisuunissaannut ineriartornissamullu toraagaqarfiunissaannut tapersiisarlunilu pingaartitsissasoq.

Instituttip pisortaata suliassai ilatigut tassaapput

• Ilinniartitaanerup, ilisimatusarnerup ineriartortitsinerullu iluanni instituttip ataatsimut sammisaanik aqutsineq ataqatigiissaarinerlu.
• Pitsaassutsinik qulakkeerinnittarneq ilinniartitsisunngorniarfimmillu aamma instituttip ilinniakkanik allanik neqeroorutaanik ineriartortitsineq.
• Ilinniartitsisunngorniarfiup, ilisimatusarnerup nunatsinnilu meeqqat atuarfiisa ataqatigiinnerannik nukittorsaaneq.
• Ilinniaqqiffinnik ingerlaqqiffiusumillu ilinniakkanik aamma piginnaanngorsaqqiinermut neqeroorutinik naleqquttunik inerisaanermut ikorfartuineq.
• Instituttimi ilisimatusarnerup avatangiisaanik ikorfartuineq, tamatumunnga ilanngullugit ilisimatuutut misissuiffik Iluliaq, ph.d.-nik ingerlassat ilisimatusarnerullu iluani suleqateqarnerit.
• Ilisimatusarnerup iluani piginnaassuseqqortussutsimik ineriartortitsinermi ilisimatusarnermullu avataanit aningaasaliiffigitinnissamut periarfissanut tapersiineq.
• Pilersaarusiornernik, pingaarnersiuinernik instituttillu isumalluutaanik naleqquttumik atuinissamik qulakkeerinninnerit.
• Ilinniartut nalerisimaarnerannik, atorfinitsitassarsiornermik, naammassinninnernik aamma ilinniakkanik taamaatitsiinnartoqannginnissaannut pinaveersaartitsinermik suliaqarnerit.
• Instituttimik ingerlatsineq aamma periusissiukkamik ineriartortitsineq pillugit instituttimi siunnersuisooqatigiit suleqatigineri.
• Ilisimatusarfimmi pisortaqatigiinni aammattaaq siunnersuisooqatigiinni ataatsimiititalianilu naleqquttuni ilaaneq.
• Ilinniartitaanermut oqartussanik, kommuninik, atuarfinnik, soraarummeertunik atorfinitsitsisartunik soqutigisaqaqatinillu allanik attaveqateqarnermik suleqatiginerannillu qulakkeerinninneq.
• Nunatsinni nunanilu tamalaani ilisimatusarnerup ilinniartitaanerullu iluanni suleqatigiinnernut tapersiineq.
• Sulisunik aqutsinermik isumaginninneq, tamatumunnga ilanngullugit malittarisassat atuuttut naapertorlugit atorfinitsitsisarneq soraarsitsisarnerlu.

Piginnaasassatut piumasaqaatit

Instituttimi pisortartaassap uku uppernarsarsinnaasariaqarpai:

• Instituttip suliassaqarfiata ilaanni ph.d.-gradeqarneq kiisalu suliassaqarfigisap iluani ilinniartitsinermik misilittagaqarneq, naleqq. Ilisimatusarfik pillugu Inatsisartut inatsisaat nr. 12, 12. juni 2019-imeersoq.
• Piginnaasat ilisimatusarnermut tunngasut uppernarsarneqarsimasut kiisalu ilisimatusarnermi ilinniartitaanermilu ineriartortitsinermik aamma ilisimatusarnermik tunngavilimmik ilinniartitsinermik misilittagaqarneq.
• Ilisimatusarnerup, ilinniartitaanerup aamma inuiaqatigiinnik sunniivigeqateqartarnerup iluanni aqutsinermik naleqquttumik misilittagaqarneq.
• Instituttimi ilisimatusarnermi avatangiisinik aamma ilisimatusarnerup iluani piginnaassuseqqortussutsimik ikorfartuisinnaaneq ineriartortitseqqiisinnaanerlu, tamatumunnga ilanngullugu ilisimatuutut misissuiffik Iluliaq.
• Sulisunik aqutsinermik misilittagaqarneq paasisimasaqarnerlu kiisalu aningaasanik aqutsinermut missingersuusiornermullu soqutigisaqarneq.
• Periusissiukkamik sulisinnaaneq aamma suleqateqarnikkut suleqatinillu peqataatitsinikkut inernernik pilersitsisinnaaneq.
• Suleqateqarnermik attaveqatigiinnermilu piginnaasaqarneq.

Qinnuteqartup nunatsinni inuiaqatigiit ilinniartitaanerullu aaqqissuussaaneranik paasisimasaqassasoq nunanullu tamalaanut tunngasut malinnaavigisinnaassagai pingaartinneqarpoq.

Qinnuteqartup kalaallit, qallunaat tuluillu oqaasii piginnaasaqarfigissavai.

Atorfinitsitseriaaseq

Rektori atorfinitsitsinermut ataatsimiititaliamik pilersitsissaaq, taakkualu qinnuteqaatit takkussuuttut pillugit ilisimatinneqartarlutillu qinnuteqartut sorliit oqaloqatiginissaannut aggersarneqassanersut innersuussisassapput.

Qinnuteqaat attavissarlu

Qinnuteqaat ukuninnga ilaqassaaq:

1. Curriculum Vitae allakkallu unnersuussissutit naleqquttut ilanngullugit.
2. Soraarummeersimanernut ilinniarsimanermullu uppernarsaatit, tamatumunnga ilanngullugu ph.d.-gradi.
3. Saqqummersissimasat allattorsimaffiat.
4. Ilaatigut ilisimatusarnermi, ilinniartitsinermi aqutsinermilu piginnaasanut uppernarsaatit naleqquttut.

Attavissaq: Atorfik pillugu apeqqutissaqaruit rektorip Mari Kleistip attaviginissaanut tikilluaqqusaavutit oqarasuaammut uunga +299 282021.

Ilisimatusarfik pillugu

Ilisimatusarfik 1984-imi pilersinneqarpoq 1989-imilu pisortatigoortumik ilisimatusarfittut akuerineqarluni. Ilisimatusarfik Issittumi ilisimatusarfiuvoq nunatsinni inuiaqatigiit aallaavigalugit nunanillu tamalaanik malinnaanikkut, ilisimatusarnikkut, ilinniartitaanikkut suleqateqarnikkullu ilisimasanik aallarnisaanermillu pilersuisoq.

Ilisimatusarfik sisamanik institutteqarpoq:

• Kulturimik, Oqaatsinik Oqaluttuarisaanermillu Ilisimatusarfik.
• Inuiaqatigiilerinermik, Aningaasaqarnermik Tusagassiornermillu Ilisimatusarfik.
• Ilinniartitsinermik Ilisimatusarfik.
• Peqqissaanermik Pinngortitamillu Ilisimatusarfik.

Siulersuisut tassaapput ilisimatusarfiup aqutsisuini qullersaasut.  Ulluinnarni aqutsineq rektorimit, prorektorimit tapersersorneqarluni, ingerlanneqarpoq. Ilisimatusarfiup rektoreqarfianiittut tassaapput rektori aamma prorektori. Ilisimatusarfiup pisortaata rektorimit piginnaatinneqarnermigut suliassani isumagisarpai. Instituttit sisamat tamarmik immikkut instituttip pisortaanit aqunneqarput, taakkualu instituttimi siunnersuisooqatigiinnit siunnersorneqarput.

Ilisimatusarfik nunatsinni nunanilu tamalaani suleqatigisat peqatigalugit ilisimatusarnerup ilinniartitsinerullu iluanni suleqateqarpoq, tamatumunnga ilanngullugit ilinniartoqarfinnik Nunanit Avannarlerneersunik, Europameersunik Amerikalu Avannarlermeersunik.

Atorfinitsitaanermi atugassarititaasut

Atorfik piffissamik killilikkami atorfiuvoq ukiunullu pingasunut killiligaalluni - sivitsorneqarsinnaasumik.

Atorfik akissaateqarfimmi LR 38-mi maanna inissisimavoq.  1. april yyyy LR 38-mi tunngaviusumik akissarsiaq tapiillu aalajangersimasut, soraarnerusutissianullu illuartittagaq ilanngullu, sivisussusilimmik atorfinitsitsinermut tapeq ilanngullugu antterussuseqarput qaamammut   Kr. 78.496 ukiumullu Kr. 941.952.

Aallaavittut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Atorfimmut tunngatillugu piffissap suliffiup annertunerpaaffianik aalajangersaasoqarsimanngilaq aamma qaangiuttoornernut taarsiiffigineqarnissaq pillugu aalajangersakkat, aamma ullunut suliffiusussaanngitsunut taartisiassat pillugit aalajangersakkat atuutissanngillat, aallaavittut sapaatip akunneranut suliffigisassat akunnerit 40-pput.

Akissarsianut atorfeqartitaanermullu atugassarititaasut, taakkununnga ilanngullugit atorfinikkiartorluni soraarnermilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Inissaqartitsineq

Atorfimmut atatillugu sulisunut inissiamik innersuussisoqarsinnaanngilaq.  Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.