Ilisimatusarfik inuussutissarsiornermi aningaasaqarnermut ilisimatusarnermi inuiaqatigiilerinermiluunniit siammasissumik sammisaqarfiit iluanni - qinnuteqartut suliassaqarfii apeqqutaallutik - lektorinik, adjunktinik, studielektorinik aamma/imaluunniit studieadjunktinik pissarsiorpoq. Oktobarip aallaqqaataani 2026 atorfinitsitsisoqarnissaa kissaatigineqarpoq, isumaqatigiinnikkulluunniit atorfinitsitsoqassaaq.

Issittumi Inuiaqatigiilerinermik Aningaasaqarnermillu Ilisimatusarfiup Immikkoortortaqarfiani sammisat nunatsinnut, nunanut tamalaanut aamma/imaluunniit Issittumut tunngavilerlugit ilisimatusaatini siammasissuni ilisimatusarnissamut periarfissaqarpoq. Ilisimatusarnerup iluani suliassaqarfiit akimorlugit suleqateqarnermik misilittagaqaruit imaluunniit ilisimatusarfiup ilisimatuutut misissuivii suleqataaffigerusukkukkit iluaqutaassaaq – piumasaqaataanngilarli. Ilisimatusarfiup ilisimatuutut misissuivii uani takukkit: Ilisimatuutut misissuinerit

Inuussutissarsiornermi aningaasaqarnermut ilisimatusarnermi inuiaqatigiilerinermilu ilinniakkanut akisussaaffik Inuiaqatigiilerinermik Aningaasaqarnermillu Ilisimatusarnermut Immikkoortortaqarfiup ataaniippoq. Taamaattumik Immikkoortortaqarfimmi atorfillit ilinniartitsinernut ilinniakkamillu ineriartortitsinermut taperseeqataanissaat naatsorsuutigineqarpoq. Bachelorinngornianut kandidatinngornianullu ilinniartitsisoqartarpoq.

Ilinniartut nunatsinni Issittumilu inuiaqatigiinni pissutsit pillugit ilinniartinneqarnissaat ilinniarfitsinnit piginnaasalinnik atorfinitsitsisartunut pingaaruteqarpoq. Immikkoortortaqarfiup ilinniakkanik sammiviini marlunni maanna 125-t missaannik ilinniartoqarpoq. Ilisimatusarfimmi ilinniartitsinerit kalaallisut, qallunaatut tuluttullu ingerlanneqarsinnaapput. Piffissaq tamakkerlugu piffissallu ilaannaani atorfillit Ilisimatusarfimmilu ilinniartut sullittartussaammatikkit, suleqatigiinnermut peqataanissannik naatsorsuutigineqarputit, Kalaallit Nunaannilu najugaqavinnissaat piumaqaataavoq.

Piginnaasassatut piumasaqaatit

• Lektorit aamma adjunktit: Ph.d.-tut qaffasissusilimmik ilisimatusarfimmit ilinniagaqarsimaneq kiisalu qinnuteqarfigisap qaffasissusaanut naleqquttumik ilisimatusarnermut, ilinniartitsinermut paasissutissiortarnermullu piginnaasaqarneq.
• Studielektori imaluunniit studieadjunkti: Kandidatitut soraarummeersimaneq. 

Suliassat

Lektoritut adjunktitulluunniit pingaarnertut suliassatit tassaassapput:

• suliatigut ilisarnaatinnut aamma soqutigisannut naleqquttuni ilinniakkap fagiini ilinniartitsineq.
• ilinniartunik bacheloritut kandidatitulluunniit allaaserinnittunik ilaatigullu ilinniakkanit allaneersunit bachelorinngornianik immikkulluunniit ilinniagalinnik ilitsersuineq soraarummeersitsisarnerlu. 
• immikkoortortaqarfiup suliassaqarfiini illillu nammineq immikkut ilisimasaqarfigisavit iluanni ilisimatusarneq kiisalu saqqummersitsisarneq ilisimatusaatinillu paasissutissiortarneq. Ilisimatusarfigisavit imaluunniit paasissutissiavit Kalaallit Nunaannut aamma/imaluunniit Issittumut tunngassuteqarnissaat pingaartinneqarpoq.
• Suleqativit suleqatiginerisigut ilinniakkamik ineriartortitseqqiineq.
• Ilisimatusarfimmi atorfilittut ilisimasannik inuiaqatigiinnut ingerlatitseqqiisarnissat naatsorsuutigineqarpoq, ass. naleqqukkaangat tusagassiorfinnit apeqqutinik akissuteqarnikkut. 
• suliamut tunngasunik nalilersuinerit.
• allaffissornermi suliassanik aaqqiissuteqaqataaneq suleqatigiinnermilu peqataaneq.

Atorfiit pillugit paasissutissat sukumiinerusut ukununnga attaveqarnikkut pissarsiarineqarsinnaapput Issittumi Inuiaqatigiilerinermik Aningaasaqarnermillu Ilisimatusarfiup Immikkoortortaqarfiata Pisortaa, Rasmus Leander Nielsen raln@uni.gl oqa. (+299) 347326 imaluunniit instituttip pisortaa prorektoriugallartorlu Annemette Nyborg Lauritsen, anla@uni.gloqa. (+299) 347360. 

Issittumi Inuiaqatigiilerinermik Aningaasaqarnermillu Ilisimatusarfiup Immikkoortortaqarfia ilinniakkallu aaqqissugaanera pillugit uani paasisaqarnerusinnaavutit www.uni.gl 

Qinnuteqaat

Inuiaqatigiilerinermik Aningaasaqarnermillu Ilisimatusarfiup Immikkoortortaqarfiani lektoritut imaluunniit adjunktitut, studielektoritut studieadjunktitulluunniit atorfininnissamut qinnuteqaat – allaganngorlugu qinnuteqaatip, atorfimmut sorlermut qinnuteqartoqarnersoq imallip, saniatigut ukuninnga imaqassaaq:

Ilanngussaq 1:     Curriculum Vitae

Ilanngussaq 2:     Soraarummeersimanernut uppernarsaatit.

Ilanngussaq 3:     Oqaaseqaatinik aallerfiusinnaasut inuit pingasut attaviginissaannut paasissutissat.

Ilanngussaq 4:     Tamakkiisumik normulersukkamillu saqqummersissimasat allattorsimaffiat.
Suliarisimasat nassiunneqartut (Ilanngussassaq 8 naleqq.) saqqummersissimasat allattorsimaffianni *-mik nalunaarsorneqassapput.

Ilanngussaq 5:     Maannamut ilisimatusaatigisimasat naatsumik allaaserineri kiisalu siunissami ilisimatusaatiginiakkap(-kat) takussutissartaat. Ilisimatusaatiginiakkat tuluttut nassuiarneqassapput.

Ilanngussaq 6:     Teaching portfolio ilinniartitsinermik piginnaasanik ilisimatusarfimmi pædagogikum-imik assigisaanilluunniit sammisaqarsimanermik takussutissartalik, kiisalu maannamut siunissamilu ilinniartitsinermik eqqarsaatersuutinik takussutissiaq.

Ilanngussaq 7:     Ilisimatusaatinik siammarterinermut takussutissiaq.

Ilanngussaq 8:     Saqqummersissimasat kapitalitut allaatigisatulluunniit takissusillit tallimat tikillugit amerlassusillit. 

Naliliisarneq atorfinitsitsisarnerlu 

Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani  naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik taassumalu kingorna oqaloqatigineqartussat  qaaqquneqarumaarput.

• Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 
• Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq. 
• Studielektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat.
• Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Kingornalu studielektoritut ajunngitsumik naliliivigineqarneq tunngavigalugu studielektoritut aalajangersimasumik atorfinitsitsisoqarsinnaavoq.

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

• Ilinniartitsinermik Ilisimatusarfik
• Inuiaqatigiilerinermik, Aningaasaqarnermik Tusagassiornermillu Ilisimatusarfik
• Kulturimik, Oqaatsinik Oqaluttuarisaanermillu Ilisimatusarfik
• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilimmarfimmi immikkoortortaqarpoq. Immikkoortortat ilinniartitsivinni ingerlatsiviusunik qanimut suleqateqartarput soorlu namminneq akunnerminni aamma suleqatigiittartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit allaffissornikkut aqutsineq, Siulersuisunik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup illutaanik sanaartornermik nakkutiginninneq aamma ingerlataraa.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
 

Qaammatini pingasuni misiliilluni atorfeqarneq

Uani atorfimmi qaammatini pingasuni misiliilluni atorfinitsitsisoqassaaq.
 

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.