Ineqarnermut Illuuteqarnermullu suliassaqarfimmut AC-fuldmægtigi
Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmi Ineqarnermut Illuuteqarnermullu suliassaqarfimmut AC-fuldmægtigi
Namminersorlutik Oqartussat inissiaataannik pitsaasumik ingerlalluartumillu allaffissornikkut aqutsinermut peqataarusuppit? Taamaappat Ineqarnermut Illuuteqarnermullu suliassaqarfimmut AC-fuldmægtigimik tunniusimasumik namminersorlunilu sulisinnaasumik pissarsiorpugut. Atorfimmi INI A/S-imik suleqateqarnermi aammalu Namminersorlutik Oqartussat inissiaataannik ulluinnarni allaffissornikkut aqutsinermi pingaarutilimmik inissisimassaatit.
Ineqarnermut suliassaqarfik innuttaasut inuunermi atugassarititaannut annertuumik pingaaruteqarpoq, aammalu inuiaqatigiinnit politikkikkullu annertuumik eqqumaffigineqarpoq. Suliassaqarfimmi ulapaarfiusumi assigiinngitsorpassuarnillu suliassaqarfiusumi suleqataalissaatit, tassani akisussaaffimmik tigusinissamut aammalu inissianik allaffissornikkut aqutsinerup ineriartortinneqarneranut peqataanissamut periarfissaqassallutit.
Atorfik pillugu
Ineqarnermut Illuuteqarnermullu suliassaqarfik ineqarnermut politikkikkut anguniakkat, aaqqissuusseqqinnerit suliniutillu ineriartortinneqarnerannut piviusunngortinneqarnerannullu peqataasarpoq, kiisalu politikkikkut aalajangiinerit aalajangersimasunik aaqqiissutissanngortinneqarnissaannut allaffissornikkullu suliniutinngortinneqarnissaannut suleqataasarluni. Tamatumunnga atatillugu suliassaqarfimmi periusissatigut suliaqarneq, inatsisinik suliaqarneq nutarterinerlu kiisalu ineqarnermut suliassaqarfimmi ataatsimut allaffissornikkut aqutsineq isumagineqartarput, ilanngullugit inissianut aningaasalersuineq aammalu Namminersorlutik Oqartussat taarsigassarsiarititaannik aqutsineq.
Tamatuma saniatigut Namminersorlutik Oqartussat illuutinut inissianullu piginnittutut inissisimanerat suliassaqarfimmi isumagineqartarpoq, ilanngullugit illuutinik pisineq tunisisarnerlu, Namminersorlutik Oqartussat inissiaataannik aqutsineq kiisalu piginnittut peqatigiiffiini piginneqatigiinnikkullu inissiani piginneqataassutit.
AC-fuldmægtigitut suliassatit pingaarnerit tassaassapput Namminersorlutik Oqartussat inissiaataannik ingerlaavartumik allaffissornikkut aqutsineq ataqatigiissaarinerlu, INI A/S qanimut suleqatigalugu. INI A/S-imik oqaloqateqarnermi attaveqaataasut pingaarnerit ilaattut inissisimassaatit, aammalu isumaqatigiissutinik, allaffissornikkut pissutsinik kiisalu inissiat ingerlanneqarnerannut aningaasaqarnerannullu tunngasunik malitseqartitsineq qulakkiissallugu.
Atorfimmi aamma ineqarnermut suliassaqarfimmi nalinginnaasumik suliassanik suliarinninneq, saaffiginnissutinut akissuteqarneq kiisalu allaffissornikkut politikkikkullu suliarineqartussanut allakkianik aalajangiinissamullu tunngavissianik suliaqarneq ilaapput.
Ineqarnermut Illuuteqarnermullu suliassaqarfimmi suleqataalissaatit, tassani allaffimmi pisortaq ataaseq sulisullu sisamat sulisuullutik.
Suliassatit pingaarnertut ukuussapput:
• Namminersorlutik Oqartussat inissiaataannik allaffissornikkut aqutsineq ingerlatsinerlu pillugit INI A/S-imik ulluinnarni oqaloqateqarneq ataqatigiissaarinerlu.
• INI A/S-imik isumaqatigiissutinik ingerlaavartumik malitseqartitsineq nutarterinerlu qulakkeerlugit.
• Namminersorlutik Oqartussat inissiaataannut inissiaqarfinnullu immikkoortortaqarfinnut tunngasunik allaffissornikkut aningaasaqarnikkullu pissutsinik malitseqartitsineq.
• Namminersorlutik Oqartussat inissiaataannik aqutsinermut, ingerlatsinermut atuinermullu tunngasunik suliassanik saaffiginnissutinillu suliarinninneq.
• Namminersorlutik Oqartussat inissiaataannik allaffissornikkut aqutsinerup ineriartortinneqarneranut, aaqqissuussaaneranut pitsanngorsarneqarneranullu peqataaneq.
• Ataatsimiinnernik piareersaaneq, oqaluuserisassanik imaqarnilianillu suliaqarneq kiisalu aalajangiinernik malitseqartitsinerup qulakkeerneqarnera.
• Allaffissornikkut politikkikkullu isummernissamut allakkianik, nassuiaatinik aalajangiinissamullu tunngavissianik suliaqarneq.
• Naalakkersuisumik ingerlaavartumik politikkikkut-allaffissornikkut sullissinermut peqataaneq, ilanngullugit innuttaasut saaffiginnissutaannut Inatsisartunillu apeqqutinut akissuteqarnerit.
• Ineqarnermut suliassaqarfimmi tusarniaanermut akissutinut, inatsisinik nassuiaarnermut nutarterinermullu peqataaneq.
• Ineqarnermut Illuuteqarnermullu suliassaqarfiup akisussaaffeqarfiisa iluanni allaffissornikkut suliassanik allanik isumaginninneq.
• Suleriaatsinik allaffissornikkullu ingerlatsinermi periutsinik pitsanngorsaanissamut pisariillisaanissamullu siunnersuutinik aktiivimik saqqummiussineq.
Qinnuteqartoq eqqortoq
Bacheloritut kandidatitulluunniit qaffasissusilimmik attuumassutilimmik ilinniagaqarsimassaatit. Pisortat allaffissornikkut ingerlatsineranni, inissianik allaffissornikkut aqutsinermi imaluunniit politikkikkut-allaffissornikkut sullissinermi misilittagaqarneq iluaqutaassaaq, piumasaqaataanngilarli.
Pingaartipparput illit:
• Ajornanngippat kalaallisut qallunaatullu marlunnik oqaaseqartutit.
• Kalaallit Nunaanni inuiaqatigiinnut kulturimullu tunngasunik ilisimasaqartutit.
• Aaqqissuussaasumik periuseqarlutillu suleriaaseqartutit, aammalu annikitsualunnut tamarmiusumullu isiginnissinnaassuseqartutit..
• Attaveqaqateqallaqqissutit aammalu ajornartorsiutit pisariusut ersarissumik paasiuminartumillu nassuiarsinnaagitit.
• Suleqatiginnikkusussuseqartutit aammalu suliatigut attaveqaqatigiinnermik pilersitsisinnaallutillu attassiinnarsinnaasutit.
• Namminersorlutit sulisinnaasutit, akisussaaffimmik tigusisinnaasutit aammalu suliassat siuariartornissaat malitseqartinneqarnissaallu qulakkeersinnaagitit.
• Suliassanik suliarinninnermi allaffissornikkullu ajornartorsiutinik aaqqiiniarnermi misissueqqissaartumik aaqqiissutissarsiortumillu suleriaaseqartutit.
• Ulluinnarni assigiinngitsunik suliassaqarfiusumi, suliassat arlallit ataatsikkut ingerlanneqarsinnaasarfianni piffissamullu killigititat sivikitsuusinnaasarfianni sulinermik nuannarisaqartutit.
• Suleriaatsinik ineriartortitsinermut pitsanngorsaanermullu peqataarusussuseqartutit.
Tamatuma saniatigut inuttut piginnaasatit pingaartippagut. Suleqatigisartakkanik assigiinngitsorpassuarnik suleqatiginnissinnaassaatit, pissuserissaartumik oqaloqatiginnittarsinnaassallutit aammalu namminersorlutit sulisinnaassallutit akisussaaffippillu iluani aalajangiisinnaassallutit.
Persuarsiorfiunngitsumik oqaloqatigiittarneq, qiimaneq aammalu ulluinnarni ulapaarfiusumi suleqatigiit imminnut ikioqatigiittarnerat pingaartippagut.
Neqeroorutigaagut
Suliffik pissanganartoq suliatigullu unammilligassalik, inuiaqatigiinnut annertuumik pingaarutilik, tassani akisussaaffimmik tigusinissamut aammalu ineqarnermut suliassaqarfiup ulluinnarni allaffissornikkut aqunneqarneranut ineriartortinneqarneranullu sunniuteqarnissamut periarfissaqassallutit.
• Suliffik namminersorfiusoq akisussaaffeqarluartorlu, assigiinngitsorpassuarnik attaveqarfigisartagalik.
• Suliffik politikkikkut aalajangiinissamut suliat ingerlanerinut qanimut inissisimasoq.
• Suliatigut inuttullu ineriartornissamut periarfissaqarluarneq.
• Sulinermi avatangiisit persuarsiorfiunngitsut ammasullu, suleqatit tunniusimasut peqatigalugit.
• Suliffik suleqatigiinnermik, nutaamik eqqarsarnermik ingerlaavartumillu pitsanngorsaanermik aallussisoq.
Sanaartornermut Immikkoortortaqarfik pillugu
Ineqarnermut Illuuteqarnermullu suliassaqarfik aaqqissuussaanikkut Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmi Sanaartornermut Immikkoortortaqarfimmi inissisimavoq.
Sanaartornermut Immikkoortortaqarfik siammasissumik akisussaaffeqarpoq. Ilaatigut qitiusumi sanaartornermut oqartussaqarfik aamma nutaanik illuliortiternermi Namminersorlutik Oqartussat qitiusumi sanatitsisutut inissisimanerat kiisalu ineqarnerup illuuteqarnerullu, isorliunerusut, sillimmasiisarnerup aammalu avataaneersut aningaasaateqarfiit aningaasalersuisarnerisa iluanni suliassat immikkoortortaqarfimmi isumagisarineqarput.
Tamatuma saniatigut Naalakkersuisoqarfimmi aningaasaqarnermi suliassat aammalu Namminersorlutik Oqartussani naalakkersuisoqarfinni suliassaqarfiit akimorlugit sanaartornermut aningaasaliissutinik aqutsineq immikkoortortaqarfiup akisussaaffigai.
Atorfininnissaq
Sapinngisamik piaartumik imaluunniit isumaqatigiissuteqarneq malillugu.
Atorfinitsitsinermut atatillugu oqaloqatigiinnerit ingerlaavartumik ingerlanneqarnissaat naatsorsuutigineqarpoq.
Soqutiginnippit?
Atorfik pillugu apeqqutissaqaruit immikkoortortaqarfimmi pisortaq Embla Kristjánsdóttir e-mailikkut emki@nanoq.gl attaveqarfigisinnaavat.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput. Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. E-mail-ikkut qinnuteqaatinik tigusineq ajorpugut.
Om Naalakkersuisut
Søger du udfordringer og har lyst til at præge hverdagen gennem dit arbejdsliv og være med til at forme fremtiden, så er et job hos Grønlands Selvstyre noget for dig. Vi forventer stor ansvarlighed og vægter faglige kvalifikationer, en sund analytisk tilgang til tingene samt omstillingsparathed højt hos medarbejderne. Herudover er din evne til at strukturere hverdagen og bevare overblikket vigtig. Grønlands Selvstyre består af en Centraladministration, med mere end 650 ansatte fordelt på flere departementer, samt en lang række decentrale enheder. Tilsammen er vi mere end 2500 mennesker tilknyttet Grønlands Selvstyre. Centraladministrationens opgave er, at sikre Naalakkersuisut (regeringen) et solidt politisk beslutningsgrundlag, samt at føre de politiske beslutninger ud i livet. Du kan læse mere om Grønlands Selvstyre på http://www.naalakkersuisut.gl/job