Suliniutinik aqutsisoq aamma Akileraartarnermut Aqutsisoqarfimmi suleriaatsit pillugit siunnersorti

Kalaallit Nunaanni akileraarusersueriaaseq nutaaq illit aamma suleqataaffigerusuppiuk?

Akileraartarnermut Aqutsisoqarfik suliniutinik aqutsisussarsiorpoq aamma digitalikkut ineriartortitsinermi aqutsisinnaasumik suleriaatsit pillugit siunnersortissarsiorluni Akileraaruseriaatsimit massakkut atorneqartumit eSkat-imit digitalikkut akileraaruseeriaatsimut nutaamut ikaarsaarnermi, misissueqqissaarinninneq sioqqullugu aamma atuutilersinneqarnissaanut nuunneqarnissaanullu, qitiusumik inissisimasunut ilaalissaatit. 

Nunap pisortaqarfiutaasa qarasaasiakkut atortorissaarutaasa ataatsip piujuartussamik suleqataaffigineqarnissaani periarfissaq qaqutigoortuuvoq.

Akileraartarnermut Aqutsiveqarfik pillugu

Akileraartarnermut Aqutsisoqarfik Kalaallit Nunaanni qitiusumik akileraartarnermut oqartussaaffiuvoq aamma Aningaasaqarnermut Naalakkersuisup ataani inissisimalluni. Aqutsisoqarfik akileraarutinik akitsuutinillu akileeqqusisarpoq, Namminersorlutik Oqartussanut akiitsunik akileeqqusisarluni aamma utoqqalinersiaqarnermut pinngitsoorani aaqqissuussamik aqutsisuulluni. Qullersaqarfik Nuummiippoq. Aqutsiveqarfiup nuna tamakkerlugu innuttaasut suliffeqarfiillu ulluinnarni attaveqarfigisarpai. 

Immikkoortortaqarfimmi paasissutissanik digitalinngortitsinermillu suliaqarfiusartumi illit ilaalissaatit. 

Akileraartarnermut Aqutsisoqarfimmi sulisugut isumassarsiortikkusuppagut ineriartortillugillu aamma ullut tamaasa illit suliassanik ilinnut unammillersinnaasunik tuniorarnissannut sinaakkutinik qulakkeerinnillutalu illit ineriartortikkusuppatsigit, tassanilu illit takutitsinissannik periarfissinneqartassaatit.

Suliassaq pillugu

Akileraaruseeriaaseq massakkut atorneqartoq taarserneqartussanngorpoq, aamma Akileraartarnermut Aqutsisoqarfiup taamaattumik taanna sioqqullugu misissueqqissaarinninneq aallartinnikuuaa, taassumalu aaqqissuussamut nutaamut suliariumannittussarsiuussineq erseqqissumik tunngavilertussaassavaa. 

Suliap taassuma saniatigut Akileraartarnermut Aqutsisoqarfiup qarasaasiatigut aqutseriaatsini suliaralugu aallartimisaarfigaa, taamaalilluni akisussaaffik, pingaarnersiuneq aamma pilersuisunik suleqateqarneq inisseriarpata inerisaanersaarsuaq aallartinneqarsinnaalissaaq. Suliniutinik aqutsisup aamma suleriaatsit pillugit siunnersortip suliat taakku marluk qanimut suliarisassavai aamma suliffeqarfiup, aqutsisut avataanilu pilersuisut akornanni ataqatigiissaarisuussaaq.

Suliniutinik aqutsisoq

Suliniutinik aqutsisutut siuariartortitsineq pilersissavat, aalajangiinerni peqataasassaatit aamma pilersuisunik aqutsissaatit.

Illit suliassatit

• Akileraartarnermut Aqutsisoqarfiup misissueqqissaarnerata ilaanik, suliariumannittussarsiuussinermik kingusinnerusukkullu atuutilersitsinermik aqutsineq
• Suliariumannittussarsiuusinermi tunngaviliornermi peqataaneq aamma kiffartuussinissamik isumaqatigiissummik isumaginninneq
• Pilersuisunik suleqateqarnermi inniminnikkanik, taggissinernik, tunniussukkanik, aningaasaqarnermik, pitsaassutsimik aamma siuariartornermik aqutsineq
• Aalajangiiffissatut tunngavissanik suliaqarneq aamma piviusorsiortumik pilersaarusiorneq, taakkunani piginnaasat, aarlerinaatit pinngitsoorneqarsinnaanngitsullu eqqarsaatigineqartassapput
• Isumannaallisaanermi nassaarineqartunik aarlerinaatinillu malitseqartitsineq kiisalu eSkat-ip massakkut atorneqarluni ingerlanneqartup ikaarsaarfimmi patajaatsuunissaanik qulakkeerinninneq
• Misileraanerit, akuersissutit, ilinniartitsinerit ingerlatsinermillu tigusinerit pilersaarusiorneri

Illit ilisarnaatitit

• Pisariaqartitsinerit pillugit qulaajaanerniit atuutilersitsinermut aamma ingerlatsinerup tunniunneqarnerinut digitalinngortitsinermik qarasaasiallu pillugit suliniutinik suliaqarnermik misilittagaqartutit
• Qarasaasiat isumannaallisarneqarnerinik ilisimasaqarnissat iluaqutaassaaq
• Aarlerinaatit suussusersisinnaassavatit aamma isumannaallisaanermik piumasaqaatit sulianut pingaarnersiukkanut suliarisinnaasassavatit kiisalu immikkut ilisimasallit peqatigalugit malitseqartitsisassallutit
• Pilersuisunik aqutsineq misilittagaqarfigigit, matumani inniminniinerit, missingiinerit, tunniunneqartartussat pillugit isumaqatigiissusiornerit, aningaasaqarnermik, pitsaassutsimik siuariartornermillu malitseqartitsisarnerit misilittagaqarfigineqarneri ilanngullugit
• Tunngaviusumik aalajangiiffigisassiorsinnaasutit aamma piviusorsiortumik pilersaarusiorsinnaasutit, taakkunani piginnaasat, aarlerinaatit pinngitsoorneqarsinnaanngitsullu eqqarsaatigineqarsimassapput
• Suliat allaavigalugit sulisunik aqutsisunillu peqataatitsisinnaassaatit aamma misileraanerit, akuersinerit, ilinniartitsinerit tunniussinerillu ilai piviusunngortitsinermut ilanngunneqarnissaat qulakkeersinnaassavatit

Suleriaatsit pillugit siunnersorti

Suleriaatsit pillugit siunnersortitut illit suliat pillugit ilisimasavit erseqqissumik suleriaatsinut, piumasaqaatinut ulluinnarnilu allannguinernut nussorsinnaasariaqarpatit.

Illit suliassatit

• Suleqatigiit peqatigalugit misissueqqissaarnermut ilaasumik massakkut suleriaatsinik qulaajarneq
• Suliffeqarfiup pisariaqartitaasa piumasaqaatinngortinneri aamma aaqqissuussap nutaap akuersissutigineqartarneranut piumasaqaatinngortinneri
• Suliffeqarfiup naatsorsuinermilu malittarisassat, paasissutissat ingerlaarneri aamma paasissutissat pitsaassusaasa ineriartortitsinermut, misissuinermut eSkatimiillu paasissutissat akuutilersinneqarneri tunngavittut atorneqarnerinik      uppernarsaasersuineq
• Suliaqarfiit assigiinngitsut apersorneqarnerinik isumasioqatigiisinneqarnerinillu piviusunngortitsineq
• Ilinniartitsineq ilisimasanillu tunioraaneq aqqutigalugit suleriaatsinik nutaanik piviusumi atuutilersitsineq
• Najukkami suleriaatsimik piginnittut nutarsarnerini suleriaatsinillu pitsanngorsaanerini tapersersorlugit

Illit ilisarnaatitit

• Immikkoortortaqarfiit, suliassaqarfiit qarasaasiallu atortorissaarutai assigiinngitsut apeqqutaatinnagit suleriaatsinik qulaajaaneq pitsanngorsaanerlu misilittagaqarfigigit
• Apersuineq, isumasioqatigiisitsineq sulisullu ilisimasaasa erseqqissumik suleriaatsit allaaserineqarnerini paasiuminartumik akisussaaffinnik erseqqissaasinnaasutit
• Suliffeqarfiup pisariaqartitai piumasaqaatinut akuersisarnermilu piumasaqaatinut aalajangersimasunut atortussanngortissinnaassavatit, taakkumi sulisut qarasaasiallu atortuinik pilersuisut malillugit sulisartussaassapput
• Suleriaatsit, paasissutissat aaqqissuussallu imminnut ataneri pilersissinnaassavatit, matumani suliffeqarfiup qitiusumik malittarisassaasa uppernarsarneqarneri aamma paasissutissat pitsaasussaasa aamma tunniussukkat suussusersinerinik ajornartorsiuteqarnerit ilanngullugit
• Suliassaqarfiit arlallit suleriaasiisa ilusaat misilillugu siammartersinnaavat aamma najukkami suleriaatsinik piginnittut suleriaatsinik nutarterinerini pitsanngorsaanerinilu ikiortarsinnaavatit

Akileraartarnermut suliassaqarfik pillugu ilisimasaqaruit iluaqutaassaaq.

Atorfinnut marlunnut taakkununnga ataatsimoorussat atuuttut

Suliat arlallit ingiaqatigiisillugit aaqqissuussaasumik sulisinnaassaatit aamma pingaarnersiuineq piginnaaneqarfigissavat.

Piumasaqaatitut allassimasut tamakkerlugit piginnaaneqarfiginngikkaluarlugit qinnuteqarnissannut kajumissaarpatsigit. Piginnaasat pingaarnerpaat uatsinnut soqutiginartut tassaapput alaatsinaattuuneq allannguerusussuseqarnerlu.

Kalaallit Nunaanni pissutsinik kalaallillu oqaasiinik ilisimasaqaruit iluaqutaassaaq.

Neqeroorutigaavut

• Kalaallit Nunaanni akileraartarnermik aqutsinermi digitalinngortitsilluni suliniutit annersaasa ilaanni  inissisimaffik pinngitsoorneqarsinnaanngitsoq
• Aqutsisut, suliassaqarfiit suleqatigisartakkallu avataaniittut qanimut suleqatigalugit sulianik aallussilluartunik avatangiiseqarneq
• Suliniutinik aqutsinermik, suliariumannittussarsiuussinermik qarasaasianillu aqutsinermik piginnaasavit inerisarneqarnissaannut periarfissat
• Kalaallit Nunaanni akileraartarnermik aqutsinerup siunissami qanoq ingerlanneqarnissaanut sunniuteqarneq

Akissarsiat atorfeqarnermilu atugassarititaasut

Aningaasarsiaqartitaanermi atorfeqartitaanermilu atugassarititaasut aamma atorfinikkiartorluni soraarnermilu angalasinnaatitaaneq pigisallu nuunneqarnerat Kalaallit Nunaanni Namminersorlutik Oqartussat pineqartullu kattuffiata isumaqatiginninniarsinnaatitaasup akornanni isumaqatigiissut piffissami sulilerfiusumi atuuttoq malillugu pissapput.

Qinnuteqartunut piginnaasanik eqqortunik uppernarsarneqarsinnaasunillu pigisalinnik isumaqatigiissutit atuuttut malillugit immikkut siunnersortitut, siunnersortit pisortaattut imaluunniit siunnersortaanertut atorfinitsitsisoqarsinnaavoq.

Ineqarneq

Atorfimmut atatillugu inissaqartitsisoqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareeruni sulisutut inissiamik innersuussivigineqarnissamut pisinnaatitaaffik attatiinnarneqassaaq. Sulisutut inigisaq atorfeqarnermut atavoq, atorfeqarunnaarnermilu qimanneqartussaassalluni.

Qinnuteqaat, CV, ilinniarsimanermut aamma pikkorissarsimanermut uppernarsaatit aamma pappiaqqat allat pingaaruteqartut "Qinnuteqaat nassiuguk" toorlugu nassiutikkit. 

Mailikkut qinnuteqaatinik tigusineq ajorpugut.

Attaveqarfissaq:

Lisbeth Møller Jensen lsmj@nanoq.gl  +299 34 65 10

Killigititaq: 10. 11. 2026