NITTARSAATEQQITAQ: Oqaasiliortunut allatsi Oqaasiliortunik sullissinermik taaguusersuuserinermillu akisussaaffilik

Oqaasileriffik Nuummiittoq fuldmægtigimik, siunnersortimik AC-fuldmægtigimilluunniit pissarsiorpoq Oqaasiliortunut allatsitut atuuffeqartussamik. Atorfik piaartumik immikkulluunniit isumaqatigiissuteqarnikkut inuttassarsiuunneqarpoq.

Ilinniarsimaneq misilittakkallu naapertorlugit fuldmægtigitut, siunnersortitut imaluunniit AC-fuldmægtigitut atorfinititsineq pissaaq. 

Atorfik pillugu
Oqaasiliortunut allatsitut Oqaasiliortunik sullissineq kalaallisullu oqaatsinik suliaqarneq pingaarnertut suliassaapput.

Suliassatit ilaatigut makkuussapput:

• Allatseqarfiup Oqaasiliortunik sullissineranut atatillugu suliassanik isumaginninneq, ilanngullugit Oqaasiliortut ataatsimiinnissaannik, suliassaannik aalajangiiffigisassaannillu piareersaanerit.
• Ataatsimiinnernit imaqarniliornerit Oqaasiliortullu aalajangiiffigisimasaannik malitseqartitsinerit
• Oqaasilerinermik taaguusersuuserinermillu suliaqarneq
• Kalaallisut oqaatsit aallutaralugit nalunaarsuineq misissuinerlu
• Suliassat kalaallisut oqaatsinut, naggueqatitta oqaasiinut Avannaamioqatigiinnilu oqaatsinut tunngasut pillugit allanik suleqateqarneq
• Oqaasileriffimmut avataanit apeqqutinik akissusioqataaneq

Atorfik namminersorluni suliaqarfiuvoq aammalu suleqatinik allanillu suleqatigisanik qanimut suleqateqarfiusarluni.

Piginnaasassat
Naatsorsuutigaarput:

• Oqaatsit pillugit ilisimatusarnermut tunngasumik ilinniagaqartutit
• Kalaallisut oqaatsit pillugit ilisimasaqarluartutit taakkuninngalu suliaqarnermik takussutissartalimmik misilittagaqarluartutit
• Ilisimatusarnermi misissueriaatsinik periutsinillu ilisimasaqartutit
• Oqaasilerinermik taaguusersuuserinermillu suliaqarnermik ilisimasaqartutit
• Namminersorsinnaasutit, aaqqissuussaasumillu sulisinnaallutillu misissueqqissaarsinnaasutit
• Piumassuseqarlutit akisussaaffimmik tigusisinnaasutit

Piumasaqaataavoq oqaatsinik ukuninnga piginnaasaqarnissat:

• Kalaallisut oqaatsit ilitsoqqussaralugit imaluunniit taamatulli allassinnaalluarlutillu oqalussinnaalluartutit
• Qallunaatut
• Tuluttut

Neqeroorutigaarput

• Kalaallisut oqaatsinik ineriartortitsinissaq nalunaarsuinissarlu siunertaralugit suliffik immikkut ilisimasalittut suliaqarfiusoq
• Oqaasilerinermi taaguusersuuserinermilu ineriartortitsinermut peqataaneq
• Suliffeqarfik suliassanik siammasissunik suliassalik suleqatillu pikkorissut
• Suliffik suliat tungaasigut ineriartorfissaqarluartoq

Sulinermi piffissaq sapaatip-akunneranut nalunaaquttap akunneri 40-t.

Oqaasileriffik pillugu
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup ataani ingerlatsivik inatsisit kalaallit oqaasiinut tunngasut tunngavigalugit suliassanik nalunaarsuinermut, ineriartortitsinermut paasissutissiinermullu tunngasunik ingerlatsisoq. Annertunerusumik nittartakkami www.oqaasileriffik.gl-imi atuarit.

Oqaasiliortut pillugit
Oqaasiliortut inissisimanerat, suliassaat atuuffiilu Oqaasiliortut pillugit Inatsisartut inatsisaat nr. 5, 1. juni 2017-imeersumi allassimapput.

Paasissutissat annertunerusut
Atorfik pillugu annertunerusumik paasisaqarusuttut saaffiginnissinnaapput, uunga:
Beatrine Heilmann, Oqaasileriffimmi pisortaq (behe@oqaasileriffik.gl, tlf.: +299 38 40 61).

Qinnuteqarnissamut killigititaq
Qinnuteqaat, ilinniarsimanermut uppernarsaat CV-lu tiguneqareersimassapput: pingasunngorneq 30. septembari 2026.
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "Qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.