Inatsisitigut sullissinermut, ataatsimiititalianut kiffartuussinermut allaffissornermullu siunnersorti

Atuisartoqarnermut Unammilleqatigiinnermullu Aqutsisoqarfik inatsisitigut sullissinerup, ataatsimiititalianut kiffartuussinerup allaffissornerullu akornanni sulisinnaasumik allattoqarfitsinnut siunnersortissarsiorpoq.

Aqutsisoqarfiuvugut mikisoq, assigiinngitsorpassuarnik aalajangersimasunik suliaqarfeqarlunilu ataatsimiititalialik. Taamaattumik atorfik allaffissornikkut nukittuumik tuniliaqutalimmut, pisortatigut aqutsinermik misilittagalimmut, inatsisitigullu sullissinermik soqutigisalimmut tulluartuuvoq. 

Aqutsisoqarfiup allattoqarfianut ilaalissaatit, aqutsisoqarfiullu inatsisilerituui, sullissisui, nutserisui aqutsisuilu qanimut suleqatigilissavatit. 

Suliassatit

Atorfik allaffissornertalimmik namminersorluni sullissinermik suliassanillu allanik imaqarpoq. Suliassatit ilaatigut tassaasassapput: 

• Naammagittaalliuutinik namminersorluni suliaqarneq, siullermik Ineqarneq pillugu Maalaaruteqartarfimmi, kingornalu Isumaginninnermi Naammagittaalliuuteqartarfik aamma periarfissaasinnaalluni
• suliamik paasissutissiineq, paasissutissanik allagaatinillu aallerneq nalilersuinerlu, kiisalu innuttaasut, pisortaqarfiit peqataasullu allat attaveqaqatigineri                                                   
• tusarniaaneq aamma sullissinermi ingerlatsineq pillugu inatsiseqarnermi maleruagassanik nalinginnaasunik atuineq
• sulianik saqqummiussinissamik oqaaseqaatiliornernillu suliaqarneq, kiisalu inassutinut missingersuutinik suliaqarneq aammalu aalajangiissutit inatsisitigut pitsaassusaanik isumannaarinninneq
• ataatsimiititaliat ataatsimiinnissaasa ataqatigiissarneri, piareersarneri inaarsarneqarnerilu kiisalu kingorna pisunik malittarinninneq
• aqutsisoqarfiup ataatsimiititaliaani suliaqarfiinilu assigiinngitsuni sulisuinilu ataqatigiissaarineq
• ilinniartunik praktikkertunillu ilinniartiissineq praktikkernermilu aqqutissiuineq
• Public360-imi sulianik pilersitsineq, paasissutissanik nalunaarsuineq suliaqarnerlu
• maili ataatsimoorussap, oqarasuaatikkut saaffiginnissutit allattoqarfimmilu suliassat allat isumagineri
• kalaallisut qallunaatullu akornanni allakkatigut oqaasiinnakkullu nutsigassat ajornannginnerumaat
• suliat ingerlasarneranik, ilisserutinik allaffissornitsigullu suleriaatsinik ineriartortitseqataaneq
• allattoqarfimmi suliassat allat naleqquttut. 

Piginnaanitit, soqutigisatit aqutsisoqarfiullu pisariaqartitai apeqqutaallutik, aqutsisoqarfiup suliassaqarfiini arlalinni suliaqarneruleriartornissannut periarfissaqassaatit.

Ilinnut ilisarititsissut

Naleqquttumik allaffissornermi ilinniagaqartuusutit, pisortatigut aqutsinerup iluani, inatsisitigut sullissinermi assigisaaniluunniit ilinniaqqikkusuttuusutit takorloorparput. 

Pisortatigut allaffissornermik namminersorlutillu sullissinermik misilittagaqaruit iluaqutaassaaq. Aaqqissuulluakkamik namminersortumillu sulisinnaassaatit, inatsisinut sulianut sulianullu ingerlasunut ajornaqutilinnut isersinnaassaatit, aammalu sulianut tunngatillugu allaffissornikkut suleriaatsinut paasisimasaqarlutit. 

Ataqatigiissaarinermut pikkorissuunissat, assigiinngitsorpassuarnik suliaqartarsinnaanissat aammalu suliaqarfinni assigiinngitsuni suleqateqartarsinnaanissat pingaartipparput. 

Kalaallisut qallunaatullu attaveqaqateqarsinnaanissat piumasaqaataavoq, tassani atorfimmi nutsigassat ajornannginnerumaat aamma ilaammata. 

Public360-imut ilisimasaqarneq aamma ataatsimiititalianik pisortaqarfinnilluunniit kiffartuussinermik misilittagaqarneq iluaqutaassapput, piumasaqaataanngillalli.

Atuisartoqarnermut Unammilleqatigiinnermullu Aqutsisoqarnermullu Aqutsisoqarfik pillugu

Atuisartoqarnermut Unammilleqatigiinnermullu Aqutsisoqarfik ataatsimiititaliat suliaqarfiillu assigiinngitsorpassuit aqutarai, tassannga ilaatigut atuisartoqarnermut, unammilleqatigiinnermut, neqerooruteqartitsisarnermut, isumaginninnermut, ineqarnermut aamma naammagittaalliuuteqartarnermut tunngasut suliaqarfiit.

Suliffeqarfiuvugut mikisoq, tassani sulisut suliaqarfinni assigiinngitsuni qanimut suleqatigiillutik. Tamanna isumaqarpoq, namminersorlutit akisussaassuseqarnissannut aamma ingerlaavartumik piginnaanitit ineriartortinnissaanut periarfissaqassasutit. 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.