Atuisartoqarnermut Unammilleqatigiinnermullu Aqutsisoqarfik ilinniagartuumik sulisussarsiorpoq

Inuiaqatigiinni suliaqarnissannik periarfissaqarlutit – ullullu assigiinngikkaluartut isumaqarluartumik suliffeqarusuppit? 

Innuttaasut pisortaniit illersugaalluarnissaat, inuiaqatigiinni iluaqutaanissaq ineriartortitsinissarlu anguniarlugit sulissutiginiarlugu Atuisartoqarnermut Unammilleqatigiinnermullu Aqutsisoqarfimmi suliffeqarfimmi anginngitsumi, inatsisilerituut, aningaaserisut ilinniagartuullu allat suliatigut ilisimasaqarluartut akornanni peqataanissannut periarfissaqassaatit. 

Immikkoortuni 12-ni oqartussaavugut, tamanna isumaqarpoq assigiiaanngitsunik suliaqartartugut. Taamaattumik sunut tamanut suliaqarsinnaanissat piumasaqaataanngilaq – alapernaatsuunissat, tunniusimanissat, suliassanullu nutaanut suliaqarusussusit pingaaruteqarnerupput. 

Assigiinngitsunik suliaqarnissannik periarfissaqassaatit

Ilinniagartuutut pisinnaasatit soqutigisatillu apeqqutaatillugit suliassanik assigiinngitsunik sulinissannik periarfissaqassaatit. 

Ilaatigut uku suliarisinnaavatit: 

• Sullissineq, sulianillu ilinniarsimasutut naliliineq
• Misissueqqissaarneq nalunaajaanerlu, tamatumunnga ilanngullugit paasissutissanik katersuineq, naliliineq aaqqissuinerlu
• Oqaaseqaatinik, nalunaajaatinik, isummernissamut tunngavissianik, nalunaarusianik, malittarisassanik ilitsersuutinillu suliaqarneq
• Suleqatit, oqartussat, suliffeqarfiit, attuumassuteqartullu allat peqatigalugit suliniuteqarneq

Sulileqqaarninni suna tamaat suliarisinnaanissat naatsorsuutiginngilarput. Kisiannili alapernaatsuunissat, suliassanullu nutaanut suliaqarnissannik soqutigisaqarnissat naatsorsuutigaarput. Ulluni suliassat allanngorartuni sulisinnaassaatit, pisinnaasannillu ineriartortitsinissannut periarfissaqassaatit.

Suliffeqarfik assigiinngissutsinik inissaqartitsisoq

Isumaginnittoqarfiuvugut anginngitsoq, tamannalu isumaqarpoq suleqatit, suliassaqarfiit aqutsisullu qanimut suleqatigissagitit. Isummernermiit iliuuseqarneq sukkasuumik pisarpoq, nammineq suliassannut aqutsisoqarfiullu ineriartorneranut sunniuteqarluarnissannut periarfissaqassaatit.

Aammattaaq suliffiup nuannersuunissaa pingaartipparput. Sulinitsinni suleqatit nuannersut, illaqatigiissinnaaneq ikiuiumatussuserlu pingaartippagut. Suliffeqarfimmi ikioqatigiiffiusumi, suliat allanngorsinnaasuni sulisinnaassaatit, ilaannikkullu suliassat ilimaginngisat suliarissallugit pisinnaassallutit.

Tunuliaqutit

Naleqquttumik kandidatitut ilinniagaqarputit, soorlu inooqatigiinnik ilisimatusartoq, inatsisileritooq, aningaaserisoq, ilinniagartuutulluunnit allamik naleqquttumik. Aaqqissuulluartumik misissueqqissaartumillu sulisarputit, suliassanillu sukkasuumik iserfigisinnaallugit. Nammineerlutit sulisinnaavutit suliassannillu akisussaaffimmik tigusisinnaallutit, ullunilu suliffiusuni suleqatit allanik ilinniagalinnik suleqateqarsinnaassaatit. 

Alapernaassaatit, tunniusimassaatit apeqqusiisinnaassaatit imaluunniit suliassanik nutaanik tigusisinnaassaatit. Suliassanik assigiinngiiaartunik sulerusussuseqassaatit, ullullu suliffiusuni suliassat assigiinngiiaartuni sulilluarsinnaassaatit.

Sullissinermik, oqartussani sulinermik imaluunniit inatsisitigut suliaqarnermik misilittagaqaruit iluaqutaassaaq, tamannali piumasaqaataanngilaq. Ilinniartutut naammasserlaajuguit, suliffitsinnilu ineriartorusukkuit ammaffigaatsigit. 

Suliffeqarfimmi anginngitsumi suliassanik assigiinngitsunik suliaqassallutit periarfissaqarlutit, suliassanillu paasisimasaqarluarneq suleqatigiilluarnerlu ataqatigiittumi sulerusukkuit, taava tusagaqarfigerusuppatsigit. 

Suleqatigut suliffeqarfik pillugu qanoq oqaaseqarpat? 

“Maani sulinermi pitsaanersaat tassaavoq, ulloq suliffiusumi susoqassanersoq inissinneqareerneq ajortoq – suleqatinullu ikioqquneq periarfissaajuaannartoq.”

“Suliffeqarfik assigiinngissutsinik inissaqartitsivoq, suliallu misilittagaqarfiginngikkaluarlugit suliarissallugit periarfissiisoq.”

“Suliatigut piginnaasat ineriartornissaat qitiutinneqarpoq, pisinnaasallu ineriartornissaat pisussaaffimmilu annertunermik tigusinissaq periarfissinneqarluarput. Suliatigut piginnaasat unammillerneqartarput, kisiannili aammaa suleqatiniit isummersoqatigiinneq tapersersorneqarnerlu periarfissaajuaannarpoq.“

Aningaasarsiatigut atorfinitsitaanermilu atugassarititaasut 

Misilittakkatit apeqqutaatillugit fuldmægtigitut imaluunniit immikkut siunnersortitut atorfinissaatit, isumaqatigiissut naapertorlugu atorfinitsitsisoqassaaq. 

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaat

Qinnuteqaat, CV, ilinniarsimanermut pikkorissarsimanermullu uppernarsaatit, uppernarsaatillu attuumassusillit “Qinnuteqaat nassiuguk” toorlugu nassiukkit. 

E-mail-ikkut qinnuteqaatinik tigusineq ajorpugut.