Atuakkialerinermik internetikkut paasissutissiisartoq

Atuagaateqarfik atuagaannarnik avatangersimaneqanngilaq. Kulturikkulli neqerooruterpaalussuarnik sammisaqartitsinernillu avatangersimaneqarpoq, avammut siammarternissaasa nuannersuunissaannik, pissanganartuunissaannik qanilaartumillu misigiffiunissaannik pisariaqartunik. Taamaattumik atuakkialerinermik internetikkut paasissutissiisartutut sulilersussamik isumassarsiullaqqissumik, pilersaarusiorsinnaasumik, oqaatsinik, kulturimik kinaassutsimillu ataqqinnilluni neqeroorutitsinnik siammarterisartussamik suleqatissarsiorpugut. Atorfinittoqassaaq oktobarip 1-ianni 2026 imaluunniit kingusinnerusukkut pisinnaavoq isumaqatigiissuteqarnikkut.

Suleqatigiinnut Sammisassaqartitsisunut attuumassuteqassaatit, atuagaateqarfiup sammisassaqartitsinissaanik, saqqummersitsinissaanik internetikkoortitsisarnissaanillu suliaqartassallutit. Atuagaateqarfimmili sulisunik allanik siammasissumik suleqateqartartussaavutit. Taakku immikkut kulturimik atuagaateqarnerullu paasissutissiissutigisarnissaanik siammartertarnissaannullu tunngasunik suliaqartarput.

Ulluinnarni suliarisartakkatsinnik inuit attaveqatigiittarfiisigut, nittartakkatsigut atuagaateqarfiullu iniutaanni tamanut ammatitatigut paasissutissiillutit siammarterisarnissamik akisussaaffeqassaatit. Atuakkanik pisiniarnermut taakkulu avammut siammarternissaannut tunngatillugu piffissami pisunik pingaartitsineq, tamatiguussuseq pitsaassuserlu pingaartippavut. 

Tamatuma saniatigut suliniutinik annertuunik arlalinnik suliaqarpugut, soorlu Repair Café, inuusuttunut suliniut titartakkanullu tunngasumik festivalertitsinissatta suliarinera. Nittarsaassisarnernut tunngasunik suleqataasassaatit.

Nuannaarutigineqarsinnaasunik, innuttaasunut attuumassuteqartunik namminerlu isumassarsiannik avammut paasissutissiisinnaavit?

Atortorissaarutinut saqqummiussisarfiusunut arlalinnut tunngatillugu tamakkiisumik isiginnissinnaallutillu pilersaarusiorluarsinnaanermik piginnaaneqarpit?

Nutaanik eqqarsarsinnaassuseqarpit, nutaaliorsinnaassuseqarlutit saaffigisanullu naleqquttumik ilisimatitsisinnaalluarlutit?

Taava tassaasinnaavutit ujartugarput. 

Pingaarnertut suliassarissavatit

- Atuagaateqarfiup inuit attaveqaqatigiittarfiutaanik ataqatigiissaarineq, ulluinnarni atuagaateqarfimmut tunngasunik nuannersunik inuppalaartunillu isiginnaagassiaaraliortarnermi aqutsisuuneq ilanngullugu

- Nittartakkatsinnik ataqatigiissaarineq, piffissami pisunik pingaartitanik pitsaasunillu imalinnik nittartakkatigoortitsisarnissamik ukkataqarneq

- Avataaneersut suleqatigalugit nittartakkatsinnik katak.gl-imik ingerlatsineq ineriartortitsinerlu

- Inuit attaveqatigiittarfiinik nittartagartaatsinnillu ineriartortitsineq 

- Atuagaateqarfiup atorniagassaataanik siammasissumik nutaaliorlunilu nittarsaassisarnissaq

- Atuagaateqarfimmi inimi tamanut ammatitamiittumi skærmimik ujaasiffissiamik  nutarterisarneq

- Atuagaateqarfiup ammanerisa nalaani aalajangersimasumik atorniartunut vagtiusarneq. Atuisartunik siammasissumik ilisimannilissaatit avammullu paasissutissiisarnissannut  naleqqussassallutit. 

Naatsorsuutigaarput:

- Atuagaatilerisutut DB/cand. scient. bibl., cand. mag. imaluunniit tassunga naleqquttumik ilinniagaqarsimasuussasutit – ilinniagaq naleqquttoq tassaasinnaavoq tusagassiortoq, attaveqaqatigiinnermut tunngasumik ilinniagalik, kulturimut attuumassutilimmik nittarsaassisarnermik ilinniagalik imaluunniit assingusut arlaat

- Inuit attaveqatigiittarfiinut tunngatillugu attaveqaqatigiinnermik nalinginnaasumik misilittagaqassasutit

- Canva atorlugu ilusilersuinermik filmilianillu aaqqissuussinermik suliaqarsinnaassasutit

- Teknikikkut piginnaasaqassasutit nittartakkatsinnillu sullissisartut suleqatigalugit nittartakkatsinnik ingerlatsinissamik ilinniartissinnaassasutit

- Annertuumik IT-mik piginnaasaqassasutit (aamma databasilerisinnaaneq periarfissaavoq) aamma nutaanik ilinniarnissamut piumassuseqassasutit – atuagaateqarfiup qarasaasiatigut atortuinik ilisimasaqareersimaguit iluaqutaassaqaaq

- Nutaaliorlutit siammarterisinnaanermik isumassarsiatsialappassuaqassasutit assigiinngitsunillu nutaaliorsinnaanermik misilittagaqassasutit.

- Oqalunnikkut allattariarsornikkullu qaffasissumik piginnaasaqassasutit

- Kalaallit kulturiannik ataqqinnittuussasutit najukkamilu inuiaqataasunut suleqateqarusuttuussasutit

Kalaallit oqaasiinik ilisimasaqarnissat iluaqutaassaaq, piumasaqaataanngilarli.

Neqeroorutigaagut

- Atorfik pissanganartoq unammillernartorlu 

- Nunatsinni kulturikkut suliniartunut inerisaaqataassaatit

- Suleqatit piginnaasaqarluartut, misilittagaqarluartut sulerusussuseqartullu suleqatigissavatit

- Inuttut suliffimmilu ineriartornissamut kiisalu nammineq inuttut ineriartornissamut periarfissagissaartoq

- Suliffik ataatsimoorfiusoq, ammasoq inussiarnersumillu oqaloqatigiissinnaanermik pingaartitsisoq

- Suliffik pissanganartoq ineriartorfiusoq, illoqarfimmi kusanartumi inissisimalluni sunngiffimmi susassaqarnissamut periarfissaqarfiullunilu pinngortitami kusanaqisumi misigisassaqarfiusoq

Uagut pilluta:

Nunatta Atuagaateqarfia Nuummi innuttaasunut atuagaateqarfiuvoq nunatsinnilu qitiusumik atuagaateqarfiugami innuttaasunut tamanut sullissisuulluni. Illoqarfiup qeqqani inissisimanermini innuttaasunit kikkunnilluunniit atorluarneqartarpoq. 

Suliffeqarfik suleqatigiinnut sisamanut agguataarneqarpoq: Suleqatigiit Groenlandica, Suleqatigiit Nunarput, Suleqatigiit Sammisassaqartitsisut aamma Suleqatigiit Kiffartuussisut. Atuagaateqarfiuvugut aaqqissuussinerpassuarnik ingerlatsisartut, Unnuk Kulturisiorfik atuakkiortumillu malunnartitsineq ukiumoortumik ingerlanneqartartut aaqqissuunneqartarlutik. Illoqarfiullu kulturikkut pikialaartitsinerani peqataarusuttarpugut, soorlu Nuummi Suialaa Arts Festivaleqaleraangat.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.