Inuussutissarsiornermut Niuernermullu immikkoortortaqarfimmut pisortaq

Inuussutissarsiornermut Aatsitassanullu Naalakkersuisoqarfik
Inuussutissarsiornermut Aatsitassanullu Naalakkersuisoqarfik Inuussutissarsiornermut Niuernermullu immikkoortortaqarfimmut pisortamik misilittagalimmik periusissiusiornermillu nukittuumik periusilimmik sulisussarsiorpoq. Atorfik Kalaallit Nunaanni inuussutissarsiortunut atugassarititaasunut toqqammaviusut ineriartortinneqarneranni qitiuvoq, tassanilu Naalakkersuisut, Naalakkersuisoqarfiit allat, kommunit, inuussutissarsiortut kiisalu nunami namminermi nunanilu tamalaani suleqatigisartakkat qanimut suleqatigineqartussaallutik.

Immikkoortortaqarfik pillugu
Inuussutissarsiornermut Niuernermullu immikkoortortaqarfiup inuussutissarsiornermut inatsisinik suliaqarneq aqutsinerlu pillugit ingerlatsinermi naalakkersuisoqarfimmilu suliassat isumagisarai. Tamatuma saniatigut inuussutissarsiortunut piumasaqaatinut killissaliussat pillugit misissueqqissaarnernik suliaqarneq immikkoortortaqarfimmi ingerlanneqarpoq, ilanngullugit takornariartitsisarneq, sermeq imerlu kiisalu niuerneq.

Immikkoortortaqarfiup Kalaallit Nunaanni inuussutissarsiornerup siuarsarneqarnera ineriartortinneqarneralu sulissutigaa. Aammattaaq ingerlatsisut attuumassutillit allat suleqatigalugit suliffissuarni suliniutinik suliassanillu angisuunik ataqatigiissaarineq immikkoortortaqarfiup isumagisaraa.

Immikkoortortaqarfik politikkikkut aalajangiisartut qanillugit sulimmat, Naalakkersuisup sullinneqarnera aammalu Naalakkersuisut politikkikkut anguniagaasa kiisalu Inatsisartut aalajangiinerisa malitseqartinneqartarnerat suliassanik isumaginninnermi pingaaruteqartunut ilaapput.

Inuussutissarsiornermut Niuernermullu immikkoortortaqarfik allaffinni marlunni, tamarmik immikkut allaffimmi pisortaqartuni, aggulugaavoq. Tamatuma saniatigut immikkoortortaqarfik katillugit 10-nik suliassanik sullissisunik sulisoqarpoq. Immikkoortortaqarfimmi pisortatut allaffiit akimorlugit aqutsineq, ataqatigiissaarineq pingaarnersiuinerlu qullersatut akisussaaffigaatit. Suliakkiisarluni akuutitsillunilu, sulisunik kajumissuseqalersitsisinnaasumik suliallu ingerlanerinik pitsaanerulersitsisinnaasumik, aqutseriaaseqarnissaq pingaartinneqarpoq.

Immikkoortortaqarfiup suliassaqarfii
Inuussutissarsiornerup ineriartortinneqarneranut Aallarnisaasarnermullu allaffik

• Takornariartitsisarneq: Takornariartitsinermut periusissamik aammalu takornariartitsinermut inatsimmik nutaamik suliaqarneq kiisalu takornariartitsinermi ingerlatsinissamut akuersissutit aqunneqarnerat.
• Inuussutissarsiutinik siuarsaaneq: Atugassarititaasunut toqqammaviusunik ineriartortitsineq nukittorsaanerlu aammalu suliniutissat aalajangersimasut inuussutissarsiortut siuariartornissaannut tunngavissiisussat – ilanngullugit nunaqarfinni.
• Avammut nioqquteqarnissamut akuersissutit: Kalaallit nioqqutissiaannik tunisassanik avammut annissinissamut, avammut nioqquteqarnissamut akuersissutinik tunniussisarneq.
• Kiffartuussinissamut isumaqatigiissutit: Kiffartuussinissamut isumaqatigiissutinik suliarinninneq malinnaanerlu, ilanngullugit Great Greenland-imut, Nalik Ventures-imut, Visit Greenland-imut isumaqatigiissutit aammalu sumiiffinni ataasiakkaani inuussutissarsiutinik siuarsaaneq pillugu isumaqatigiissutit.
• Sermeq imerlu: Qinnuteqaatinik akuersissutinillu suliarinninneq kiisalu avammut nioqquteqarnissaq ukkataralugu sermimut imermullu periusissiamik nutaamik ineriartortitsineq.
• Uumassusillit sananeqaataannit isumalluutit: Piujuartitsinissaq naapertuilluartumillu pissarsiassanik agguaanissaq ukkataralugit uumassusillit sananeqaataannit isumalluutinik ilisimatusarnissaq avammullu nioqquteqarnissaq pillugit qinnuteqaatinik suliarinninneq malinnaanerlu.

Nunani Tamalaani Suleqatigiinnernut Inatsisilerinermillu allaffik

• Niuernermut politikki: Kalaallit Nunaanni niuernermut politikkikkut sinaakkutissanik suliaqarneq
• Niuernermut isumaqatigiissutit: Niuernermut isumaqatigiissutinut isumaqatiginninniarnernut suliarinninnernullu akisussaasuuneq
• Joint Committee: Niuerneq, aningaasaliinerit takornariartitsisarnerlu ukkataralugit Kalaallit Nunaata USA-mut joint committee-mi suleqateqarnerani peqataaneq.
• Nittarsaassineq inuussutissarsiortullu tuniniagassaanik pilerisaarinerit: Nunami namminermi aamma nunani tamalaani nittarsaassinerni avammullu nioqquteqarnerni pilerisaarinerni peqataaneq.
• Nunani Avannarlerni aammalu EU-mut sammisumik suleqateqarneq: Nunani Avannarlerni atorfilittanut komité-ni kiisalu EU-mi Interreg NPA-program-imi peqataaneq.
• Aningaasaliinissanut misissuinerit: Aningaasaliinissanut misissuinernut sinaakkutissanik ineriartortitsineq atuutsitsilertarnerlu kiisalu misissuinermi suliassanik aalajangersimasunik suliarinninneq.

Atorfik 
Immikkoortortaqarfimmi pisortatut immikkoortortaqarfimmi pingaarnertigut suliassat, sulisoqarneq aningaasaqarnerlu akisussaaffigalugit. Politikkikkut isummernissamut tunngavissiat, periusissiat aalajangiinissamullu tunngavissat qaffasissumik pitsaassuseqarnissaat qulakkiissavat kiisalu Naalakkersuisut inuussutissarsiornermut niuernermullu politikkikkut pingaarnersiuinerannut eqeersimaartumik tapersiissallutit. Atorfimmi inissisimaneq nunami namminermi taamatullu nunani tamalaani annertuumik suleqatiginniffiusarpoq sinniisuuffiusarlunilu.

Tamatuma saniatigut immikkoortortaqarfimmi pisortatut immikkoortortaqarfimmi inatsisinik piareersaalluni sulinerup inatsisitigullu nalilersuinerit qaffasissumik pitsaassuseqarnissaasa qulakkeernissaa akisussaaffigaat. Inatsisilerituujusariaqanngilatit, kisianni suliatigut immikkut ilisimasallit suleqatigisartakkallu attuumassutillit qanimut suleqatigalugit sammiviliisinnaassaatit, pingaarnersiuisinnaassaatit aammalu inatsisitigut aaqqiissutissat attanneqarsinnaasut qulakkeersinnaassallugit.

Ilinniarsimanikkut aqutsinikkullu piumasaqaatit
Immikkoortortaqarfimmi pisortaq aqutsinermut nukittuunik piginnaasaqarluni aqutsisutut misilittagaqartuussaaq kiisalu pisortat ingerlatsinerannik, aaqqissuussaanermi politikkikkut aqunneqartumi aningaasaqarnermillu aqutsinermi annertuumik paasisimasaqassasoq misilittagaqassasorlu piumasarineqarpoq. Pingaartinneqarput:

• Naleqquttumik ingerlaqqiffiusumik ilinniarsimaneq
• Patajaatsumik aqutsisutut misilittagaqarneq aammalu aaqqissuussaanermut politikkikkut aqunneqartumut paasisimanninneq
• Misissueqqissaarnernut periusissatigullu nukittuumik piginnaasaqarneq
• Politikkikkut anguniakkanik angusaqarnissamik iliuuseqarsinnaallutillu aqutsisinnaassaatit
• Suleqatiginnilluarsinnaaneq sunniuteqarsinnaalluarnerlu

Neqeroorutigaagut

• Namminersorlutik Oqartussani pisortatut atorfik pissanganartoq sunniuteqarfiulluartorlu
• Kalaallit Nunaanni inuussutissarsiornerup niuernerullu ineriartortinneqarneranni sunniinissamut periarfissaqarneq
• Qaffasissumik ilinniarsimasunik avatangiiseqarneq, sulisut aallussilluartuullutillu piginnaaneqarluarlutut akornanni
• Namminersorlutik Oqartussani pisortanut isumaqatigiissutit atuuttut naapertorlugit aningaasarsianut atorfininnermilu atugassarititaasut atuupput

Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi maanna inissisimavoq.  1. april 2026 LR 38-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut  Kr. 64.048 ukiumullu Kr. 768.576.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.