AC-fuldmægtigi / Specialkonsulenti

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik akademikarimik sulisussarsiorpoq

Kulturimut, Timersornermut Ilageeqarnermullu Immikkoortortaqarfik sulisumik tunniusimasumik misissueqqissaarsinnaasumillu pissarsiorpoq, naalakkersuinikkut ingerlatsinermut qanittumik suliaqarnissamik soqutigisalimmik aammalu Kalaallit Nunaanni kulturikkut timersornikkullu ineriartortitsinermut peqataarusuttumik. Atorfik 1. november 2026 aallartiffigineqarsinnaavoq, imaluunniit isumaqatigiissuteqarnikkut.

Immikkoortortaqarfimmi ilaaleruit periarfissaqalissaatit naalakkersuinikkut anguniakkat suliniutinut aalajangersimasunut inuiaqatigiinnut kulturikkut timersornikkullu iluaqutaasussanngorlugit suliniutigisarnissaannut. Suleqatit pikkorissut akornanni suleqataalissaatit, suleqatigiillu akornanni ilisimasatigut nukittuumik avatangiiseqarlutit, nammineersinnaassuseq annertooq kiisalu inuttut suliatigullu ineriartornissamut pitsaasunik periarfissaqarlutit.

Atorfik pillugu

Kulturikkut timersornikkullu politikikkut suliaqarfinni pingaarutilimmik inissisimassaatit kiisalu Naalakkersuisoqarfiup, kulturikkut timersornikkullu kattuffiit, kommunit kiisalu suleqatigisat allat akornanni attaveqaataassallutit. Suliassat assigiinngiiaarput, aammalu periusissiornikkut, misissueqqissaarinermut ingerlatsinermullu tunngasunik suliaqarnissannut periarfissaqassallutit.

Suliassat pingaarnerit

• Naalakkersuisunut aalajangiiffigisassatut saqqummiussassanik suliaqarneq.
• Misissueqqissaarnernik, tunuliaqutaasunik nalunaarusianik kiisalu aalajangiinissamut tunngavissiissutinik suliaqarneq.
• Kulturimut timersornermullu tunngasunik suliniutinik aqutsineq ataqatigiissaarinerlu.
• Kulturikkut eqqumiitsuliornikkullu aningaasaliissutinut tapiissutinullu aaqqissuussinernik allaffissornikkut ingerlatsineq ineriartortitsinerlu.
• Kulturikkut ingerlatsiviit, timersornikkut kattuffiit kiisalu pisortat akornanni suleqateqarneq oqaloqateqarnerlu.
• Politikkikkut suliniutinik, tusagassiorfinnut nalunaarutinik kiisalu paasissutissiissutinik allanik saqqummiussineq.
• Kulturimut timersornermullu tunngatillugu suliniutinik periusissianillu nutaanik ineriartortitsinermut peqataaneq.

Kinaavit?

Takorloorparput kandidatitut ilinniagaqarsimasutit aammalu politikkip, inuiaqatigiilerinermik ineriartortitsinermillu akornanni suliaqarnissaq kajumeralugu. Pingaarnerpaavoq ilisimasaqarusullutillu nutaaliornissamut piumassuseqartutit kiisalu suliassat pingaarnersiuinerillu sukkasuumik allanngorsinnaaffianni sulinissamut piareersimasutit.

Pingaartipparput:

• Kandidatitut qaffasissusilimmik ilinniagaqarsimanissat.
• Ajornartorsiutinik pisariusunik misissueqqissaarsinnaanissat paasiuminartunillu innersuussutinik saqqummiussisinnaanissat.
• Kalaallisut danskisut tuluttullu allattariarsornermi oqalunnermilu pitsaasumik piginnaasaqartuunissat.
• Nammineerlutit sulisinnaanissat aammalu nammineq suliannut akisussaaffimmik tigusisinnaanissat.
• Suleqatikkuminartuunissat aammalu suliffeqarfiit assigiinngitsut akornanni pitsaasunik attaveqalersitsisinnaanissat.
• Kulturimut, sunngiffimmut timersornermullu tunngasunik paasisimasaqarnissat imaluunniit soqutigisaqarnissat.
• Naalakkersuinikkut aqunneqartumi, pisortat ingerlatsivianni imaluunniit namminersorlutik inuussutissarsiortut akornanni misilittagaqarnissat. Tamanna iluaqutaassaaq, piumasaqaataananili.
• Suliffimmi ulapaarfiusumi, piffissaliussat sivikitsut kiisalu soqutigisaqaqatigiit amerlasuut akornanni sulisinnaanissat.

Neqeroorutigaavut

• Naalakkersuinikkut aalajangiisarnernut qanittumik suliffik pissanganartoq.
• Kalaallit Nunaanni kulturikkut timersornikkullu ineriartortitsinermut sunniuteqarnissamut periarfissaq.
• Ulluinnaq suliffik assigiinngiiaartoq isumalioqqissaarnermillu imaqartoq kiisalu attaveqarfiusoq annertooq.
• Akisussaaffik aammalu suliatigut ineriartornissamut periarfissat.
• Suleqatit pikkorissut tunniusimasullu aammalu suliffiup avatangiisai suleqatigiinnermik tunngavillit ammasullu.

Inuiaqatigiit ineriartortinneqarnerat, kulturikkut ingerlatsineq timersornerlu soqutigigukkit aammalu suliffiit aqqutigalugu allanngueqataarusukkuit, qinnuteqaatippit tigunissaanut qilanaarpugut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.