Digitalikkut immikkoortortaqarfik inuiaqatiigiinnut pingaarutilik aqutsisuuffigiuk

Nittartakkat innuttaasut, sulisut oqartussallu pisariaqartitaat siuttuuffigerusuppigit – immikkoortortaqarfimilu ingerlalluartumi ineriartortitseqataallutit?

Digitalikkut Kiffartuussivik immikkoortortaqarfiuvoq suleriaatsitigut ersarissumik, akissussaaffeqarluartumik tunniusimasunillu sulisoqartunik ingerlanneqarluartoq.
Taamaattumik suliassarissavat suna tamaat aallaqqaataaneernangu kisianni ineriartortitsinissat: ulluinnarni suliassanik aalajangersimasumik ingerlatsineq ataavartuarnissaa illersorlugu, pisariaqartitallu aallaavigalugit isumannaatsunik, atoruminartumik ataqatigiissaarneqarluartunillu digitalikkut aaqqiissutit  pilersinneqarnissai qulakkeerlugit.

Aqutsisoq ersarissumik sunniutilik

Pisortat oqartussaqarfiisa assigiinngitsuneersut nittartagai Digitalikkut Kiffartuussiviup teknikkertaatigut isumagisarivai. Assersuutigalugu sullissivik.gl, naalakkersuisut.gl, Namminersorlutik Oqartussat intranet-iat. Nittartakkat assigiinngitsunut saaffiginnillutillu piginnittoqarput, tamarmilli anguniagaat assigiippoq: pisortanit paasissutissat digitalikkullu sullississutit pisariitsumik, tamakkiisumik, isumannaatsumik, ajoquteqanngitsumillu pissarsiarineqarsinnaanissaat atorneqarsinnaanissaallu.

Pitsaassaaq: 

• Qaffasissumik sulinerup piujuaannarnissaa ineriartortinnissaallu qulakkeersinnaagukku
• Aqitsineq sulinermi pingaartikkukku, taaguutitut isigiinnarnagu
• Suliniutinut aqutsisut, suliffinni siunnersortit Digitalinngortitsinermilu Aqutsisoqarfimmi pisortat oqaloqatigalugit siunnersueqatigisinnaagukkit
• Attaveqallaqqikkuit, oqaasiinnartigut allattariarsornikkullu
• Inuiaqatigiinni pisortaqarfinnilu pissutsit ilisimasaqarfigigukkit
• Suliniutinut aqutsinermut misilittakkatit takussutissaqartikkukkit

Immikkoortortaqarfimmi pisortatut suliassaqarfimmi inuiaqatigiinnut pingaaruteqarluartumi sulisut, ingerlatsineq, ineriartortitassat, aningaasaqarnerlu akisussaaffigissavatit. Aqutsisoqarfimmi pisortaq pisortarissavat, Digitalinngortitsinermullu Aqutsisoqarfimmi aqutsineq tamaat isigalugu periusissiornissaq sunniuteqarfigissallugu.

Suliassat pingaarnerpaaq

Ingerlalluartoqarnera eqqarsaatigalugu ineriartortitsinissaq ingerlatissavat.
Immikkoortortaqarfik ingerlalluarpoq, sulisullu suliaminnut atatillugu suleriaatsinik pitsaasunik malitaqarput. Taamaattumik immikkoortortaqarfiup aaqqissuussaanera paasisaqarfigerusullugu, sulisut misilittagaat tusarnaassavatit, kiisalu pitsaassusaq ataavartumillu ingerlatseriaaseq pilersinneqarsimasoq illersussallugu. Tamatumalu saniatigut immikkoortortaqarfiup ineriartortinnissaa isumagissavat, pingaarnersiuillutillu nittartakkanik atuisut pisariaqartitaat, piumasaqaatit teknikkikkullu periarfissat aallaavigalugit.
Pisortaq aalangiusimasoq ineriartortitsisinnaasorlu pisariaqartinneqarpoq – ilisimannilluartorlu ineriartortitsiuarsinnaaneq pinngortartoq suleqatit, piginnittut, oqartussat, kommunit pisiniartarfiillu suleqatiginerisigut.

Akisussaaffigisassatit

• Immikkoortortaqarfiup nittartakkat sullississutillu isumagisaasa aalajaatsumik, isumannaatsumik, suliamillu ilisimasaqarluartutut ingerlanneqarnissaat qulakkeerlugu
• Sulisut aqullugit, kajumissarlugit ineriartortillugillu, kiisalu akisussaaffii, suliassai, ingerlalluarnissaat taavalu suleqateqarluarnissaat erseqqarissumik sinaakkusersorlugit
• Suleriaatsit, malitassat pitsaasumillu suliaqarnissap allaganngorlugit takussutissaqartittarnissaat illersorlugu – aamma pisariaqartinneqaraangat pitsanngorsartarnissaat kiisalu ataatsimut akisussaaffeqataaneq
• Immikkoortortaqarfiup suliassaasa pilersaarusiortarnissai, anguniagassat allattortarnissai, aningaasaqarnikkut sulisussaqarnikkullu pingaarnersiuisarnissaq, taakkulu aqutsisoqarfiup periusissiai aallaavigalugit malinneqartarnissaat qulakkeerlugu.
• Nittartakkanut sullissivik.gl, naalakkersuisut.gl, intranet, pisortaqarfinniillu nittartakkanut soqutiginnittut piginnittullu ataatsimut ingerlanissaasa qulakkeernissaa
• Namminersorlutik Oqartussani sulisut, kommunini sulisut pisortaqarfinniillu allanit suleqatit akisussaaffiisa erseqqarissumik suunerinik qulakkeerinninnissaq, piffissaq eqqorlugu akiuliutsitsisarnissaq, pineqartunullu attaveqarluartarnissaq.

Ulluinnat assigiinngisitaartut suliffimmi soqutiginartumi
Atorfik soqutiginartoq suliassanillu assigiinngisitaartulik aamma sulinermi ilisimasanik atuiffiusoq ineriartortitsiviusorlu neqeroorutigaarput. Ulluinnarni aqutsineq akisussaaffigilissavat, taamatuttaarlu immikkoortortaqarfiup suliassaannut qanimut suleqataanissannut periarfissaqassaatit.

Immikkoortortaqarfimmi pisortatut immikkoortortaqarfimmi suliniutinut nutaanut, pilersaarutaasunut ingerlasunulllu ilaassaatit – pisariaqartitsiffiusunilu suliniutini sulisutut nammineq ilaasalissallutit- , tassani ilaapput suliniutit PDA-mut qinnuteqarfigineqartussat. Tamakku ilinnut aqutsinikkut, aaqqissuussaanikkut, kiisalu piviusunngortitsinissap tungaanut siunnersioqatigiinnerni suleqataasarnissannut, taavalu patajaatsumik ingerlatsitsilernissamut qulakkeerinninneqataanissannut periarfissiipput.

Apeqqutit
Atorfik pillugu paasisaqarusukkuit, Aqutsisoqarfimmi pisortaq René Kvist mailikkut ugguuna: rekv@nanoq.gl attavigisinnaavat.

Qinnuteqarnissamut periarfissaq kingulleq
Qinnuteqarnissamut periarfissaq kingulleq tassaavoq 28.09.2026.

Atorfinitsitsisarneq pillugu ataatsimiititaliap qinnuteqarnissamut piffissaliussatut killiliussap naannginnerani oqaloqatiginneqqaarnissanut aggersaanissani pisinnaatitaaffigivaa.

Atorfinitsitsinissamut oqaloqatiginninnerit 29.- 30. september 2026-mi ingerlanneqassangatinneqarput, taamaattumillu qinnuteqartut piffissami pineqartumi aggersarneqarnissaminnut piareersimanissaminnut qinnuigineqarput.

Akissarsiat atorfeqarnermilu atugassarititaasut
Atorfik akissaateqarfimmi LR 38-mi maanna inissisimavoq.  1. april yyyy LR 38-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut   Kr. 64.048 ukiumullu Kr. 768.576.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Atorfiup 01. november 2026-mi imaluunniit isumaqatigiissuteqarnikkut inuttalerneqarnissaa kissaatigineqarpoq.

Atorfininnissamut naatsorsuutaavoq sillimaniarneq pillugu akuerineqarnissat atorfeqarnerillu tamakkerlugu isumannaallisaaneq pillugu akuersissutip attanneqarnissaa.

Aallaavittut isumaqatigiissutit nalinginnaasut atorlugit atorfinitsitsisoqassaaq, qinnuteqartorli Kalaallit Nunaanni pisortani atorfeqarnermut inatsit naapertorlugu siusinnerusukkut atorfilittut (tjenestemanditut) atorfeqareersuuppat, atorfilittut (tjenestemanditut) atorfinitsitsisoqarsinnaavoq.

Atorfimmut atatillugu suliffissap sapaatip akunneranut qaffasinnerpaaffissaanik aalajangersagaqanngilaq, suliartortarnermilu piffissat qaangiuttoornernut taarsiissutit pillugit aalajangersakkat kiisalu ullut sulinngiffissat annaasassat pillugit aalajangersakkat atorneqassanngillat, sapaatip-akunneranilu suliffissaq aallaavittut 40 tiimiuvoq.

Inissaqartitsineq

 Atorfimmut atatillugu malittarisassat sukkulluunniit atuutsinneqartut naapertorlugit sulisunut inissiamik pequsersoringaanngitsumik innersuussisoqarsinnaavoq. Qinnuteqartut atorfitsik aqqutigalugu ineqartinneqareersut imaluunniit kommunimiit Namminersorlutik Oqartussanilluunniit pigineqartunik ineqartut inissaannik innersuussisoqarsinnaanngilaq. Ineqarnermut akiliut aamma ineqarnermut qularnaveeqqusiissutit inigisamut innersuunneqartumut malittarisassat atuuttut naapertorlugit akilerneqartassapput. Sulisutut inigisaq atorfeqarnermut atasuuvoq, atorfeqarunnaarnermilu qimanneqartussaassalluni.

Ineqarnermut akiliut aamma inissiap pitsaassusia inissiap qanga sananeqarsimanera, piginnittua il.il. apeqqutaallutik nikerarsinnaapput. Sulisutut ataavartumik initaarnissaq utaqqinarsinnaavoq, taamaattumik utaqqiisaasumik inissiisoqarsinnaasarpoq, matumani najugaqatigiiffiit minnerusut imaluunniit akunnittarfinni inissiat aamma  ilanngullugit najugaqarfigineqarsinnaallutik, taakkulu akileraarusersorneqartussaapput. Sulisunut inissiami imaluunniit utaqqiisaasumik inigisami uumasuutit anginerusut, soorlu qimmit qitsuilluunniit, uumasuutigineqaqqusaanngillat.

Digitalinngortitsinermik Aqutsisoqarfik pillugu 
Digitalinngortitsinermut Aqutsisoqarfimmi siunissami digitalimik atuineq isumannaatsoq anguniarneqarpoq, aqutsisoqarfimmiillu inuiaqatigiit digitalimik aaqqissuussanik isumannaatsumik assigiissakkanillu atuisinnaanissaat qulakkeerniarneqarluni.

Digitalinngortitsinermik Aqutsisoqarfimmi Kalaallit Nunaanni aammalu Namminersorlutik Oqartussaqarfimmi IT-qarnermi atortunik digitalinngortitsinermik suliaqartarpugut. Aqutsisoqarfimmi suliassaqarfiit assigiinngillat, aqutsisoqarfiullu suliassaannut naatsorsuutit aamma assigiinngitsuullutik. 

Kalaallit Nunaanni digitalinngortitsinermik suliaqarnerput tulluusimaarutigeqaarput, suliarlu maniguulluta suliaralutigu. Suliassat suliarinissaannut ilisimasaqartariaqarlutalu piginnaaneqartariaqarpugut, tamannalu ulluinnatsinnik ulapaartitsillunilu allanngorartitsivoq. Ulluinnarni sulisut naammagisimaarinninnissaat anguniarlugu suliat pillugit inuttullu assigiinngissutsit ataqqillugit suleqatigiinneq qitiutillugu sulivugut – sulianillu pitsaasumik naammassinninnissaq ukkataralutigu. 

Aqutsisoqarfik nunalu tamakkerlugu digitalinngortitsinermut periusissiaq www.digitalimik.gl aqqutigalugu paasisaqarnerusinnaavutit.